Қасиетті домбыра

Біржан сал атындағы музыкалық колледж­де, Қазақ хандығының 550 жылдығы мерекесі аясында, Көкшетау қаласы әкімінің кубогын сарапқа салған облыстық «Қасиетті домбыра» байқауы өткізілді. Байқаудың негізгі ұстанымы қазақ халқының мәдениетін өскелең ұрпаққа, өнерсүйер жұрт­шылыққа кеңінен насихаттау, жас таланттар мен шебер орындаушылардың жолын ашу болып табылады. «Әнді сүйсең, менше сүй», деп дана Абай айтқандай, хал­қымыздың қара домбырасы – қазақтың ән мен күй құдіретін асқақтатқан, тарих үнін жалғас­тырған ұлы жәдігеріміз. Қазақтың әні мен күйі – халқымыздың көне заманнан бері қалыптасқан асыл қазынасы, ұлттың бекзат болмысы, жүрек сыздатқан сағынышы, көңілдің нәзік қылын шертер сезімі, мұң-шері, қызық-қуанышы. Сондықтан болса керек, үкілі домбырамыздың үні екі күн бойы Көкше аспанында әуелей қалықтап, жүректерді тербетіп тұрды. Байқауға Көкшетау қаласының, Ақкөл, Ерейментау, Егіндікөл және Зеренді аудандарының жүйрік 25 домбырашысы қаты­сып, өнер жарысының көрігін қыздыра білді. Қазылар алқасы оза шапқан үздіктерді анықтау үшін аз тер төкпегенін де бай­қа­дық. Әйткенмен, «жарыс мұ­раты – жеңу», демекші шоқ­тығы биік домбырашыларға жұрт­шы­лық дүркірете қол соғып, риза­шы­лықтарын білдірді. Сөйтіп, «Үздік домбырашы» атауында көкшетаулық Мағжан Кәрібаев, «Үздік дәстүрлі әнші» – Зинулғабиден Нұрмағамбет (Егін­дыкөл ауданы); «Ерекше дауыс» – Серғазы Қарақат (Ақкөл ауданы); «Көрермен көзайымы» – Байғабылов Әлішер (Көкшетау қаласы) жеңімпаз атанды. Оларға кубок, диплом және бағалы сый­лықтар тапсырылды. Байқауға қатысушыларды құттықтаған Көкшетау қала­сы әкімінің орынбасары Алты­най Әміренова «Қасиетті домбы­раның» дәстүрлі сипат алатынын мәлімдеді. Бақберген АМАЛБЕК, «Егемен Қазақстан». Ақмола облысы. Суретте: байқаудан көрініс.