Ақтөбеде 15 ірі жоба жүзеге асырылып жатыр

АҚТӨБЕ. 16 қаңтар. «ҚазАгроҚаржы» акционерлік қоғамының қолдауымен Ақтөбе облысында азық-түлік белдеуі құрылды. Бұл туралы egemen.kz тілшісі хабарлады. «ҚазАгроҚаржы» АҚ-тың Ақтөбе облыстық филиалының директоры Қорған Нұртазиннің айтуынша, акционерлік қоғамның Екі сүт-тауар фермасы, шошқа фермасы, екі репродуктор, екі жылыжай, көкөніс қоймасы және бірқатар өңдеуші кәсіпорын салынды. 2000 жылдан бері «ҚазАгроҚаржы» акционерлік қоғамы тарапынан облыстың ауылшаруашылығы техникалық паркін жаңарту мақсатында  24,2 млрд. теңге қаржы қаралды. Ал биыл бұл мақсатта 7 млрд. теңге қаражат бөлінді. 2000 жылдан бері облыста 478 ауыл шаруашылық құрылымына 976 техника берілді. Аталған құрылымның қолдауымен «Ірі қара етінің экспорттық әлеуетін дамыту» бағдарламасы аясында шетелден етті және сүтті бағыттағы 3000 бас ірі қара сатып алынған. Биыл Ұлттық Қор қаржысы мен бюджеттен тыс қаражат есебінен  7 инвестициялық жобаны жүзеге асыру мақсатында 6,5 млрд. теңге бөлінген. Облыстағы 108 шаруашылық жалпы құны 645,9 млн. теңге болатын 203 техника сатып алу мақсатында 175 келісім жасаған. 2013 жылдан бастап жүзеге асырылып келе жатқан шаруашылықтарды қаржылай сауықтыру және лизинг бойынша алынған технологиялық жабдықтарды субсидиялау бағдарламасы шеңберінде 283,1 млн. теңге мемлекет тарапынан субсидияланған. Қорған Нұртазиннің айтуынша, бүгінде акционерлік қоғамының қаржыландыруымен Ақтөбе өңірінде 15 ірі жоба жүзеге асырылуда. Сатыбалды Сәуірбай. Дерек: egemen.kz. Сурет: forums.garene.ru.