Жаңа заң бизнестің өрісін кеңейтеді

Кеше Орталық коммуникациялар қызметінде Ұлттық кәсіпкерлер палатасы басқарма төрағасының орынбасарлары Нұржан Әлтаев пен Гүлнәр Құрбанбаева баспасөз мәслихатын өткізді. Онда өзгертулер мен толықтырулар енгізіліп қабылданған, кәсіпкерлікке қатысты жаңа заң туралы айтылды. Заңның кәсіпкерлікке тиім­ді тұстары мен ондағы артық­шылықтар жөнінде әңгі­ме­леген спикерлер, ендігі кезекте оны жұртшылыққа түсіндіру жұмыстарын жүргізу керектігіне көңіл аударды. Сөйтіп, кәсіп­керлікке қойылатын бірқатар жөнсіз талаптар заң актілерінен алынып тасталып, бизнестің еркін дамуына жол ашылғанына тоқталды. Нақты сандарды сөй­летер болсақ, бұған дейін кәсіп­керлерге қойылып келген 5228 талаптың 1810-ы қысқартылған. Сондай-ақ, кәсіпкерлікпен шұғылдануға алынатын рұқсат құжаттары да 35-ке кеміпті. Бұлармен бірге, Мемлекет бас­шысы берген тапсырмаға орай бизнестің дамуына кедергі келтіретін нормалар жойылып, заңнамаға толық дерлік ревизия жасалған. Ревизияның нәтижесі бойынша заңға 100-ден астам түзетулер енген. Қазіргі уақытта заңға қосымша актілерге 70-ке жуық өзгерістер жасау мәселесі талқыланып жатқан көрінеді. Осы игі шаралардың негізіне қарағанда, заман талабына сай жетілдірілген заң кәсіпкерлердің тынысын да, өрісін де кеңейте беретіні анық. Спикерлер тексеруге жа­рия­ланған былтырғы мора­торий­дің  нәтижелері туралы да әңгімеледі. «Өткен жылы мораторий жарияланғанда мүл­дем тексеріс болмады. Әуелде Ұлттық кәсіпкерлер палатасы осындай мораторийді ұсынған кезде мемлекеттік органдардың көбі сенімсіздік танытқаны есте. Яғни, осыны пайдаланып, заң және тәртіп бұзу оқиғалары көптеп орын алады деген болжам­дар айтылған-ды. Бәріңіз куә болғандай, мораторий кезінде жаппай заң бұзушылықтар, адам­дардың жаппай улануы, төтенше жағдайлар тәрізді келеңсіз жағдайлар бола қойған жоқ», деді Н.Әлтаев. Ол осыны ескеріп, кәсіпкерлерге көбірек сенім арту керектігіне де назар аударды. Кәсіпкерлер арасында биз­несті тексеруге қойылған мора­торий мерзімі біткен соң не бола­ды деген сұрақ бар көрінеді. Осы­ған байланысты елімізде жос­парлы жұмыс жүріп жатыр екен. Мысалы, жоспарлы тексерістер алынып тасталып, бақылаудың ерекше тәртібі іске қосылыпты. Бүгінде осы бақылаудың ерекше тәртібін жүзеге асыру үшін әрбір ведомствоға сәйкес бұй­рық­тар қабылдау қажет. Ал бұйрықтарды қабылдау үшін оларға тәуекелді бағалау жүйесін құру керек көрінеді. Бүгінде барлық мемлекеттік органдар осы шаруамен шұғылдануда. Сондықтан кәсіпкерлік субъек­тілерінің қызметін бақылау жұ­мыстары алдағы шілде айы­нан кейін ғана басталатынын жеткізді басқарма төрағасының орынбасары. Оның айтқанына илансақ, бизнес мемлекеттік органдар тарапынан бақылау болмаса да жап-жақсы жұмыс істей ала­ты­нын дәлелдеген. Сондай-ақ, мораторий кезеңінде еңбек өнімділігі мен өнім өндіру көлемі артып, бизнестің белсенділігі 6 пайызға дейін өскен. Тағы бір көңіл демдеген мәлім­деме, биыл еліміздегі бар­лық аудандарда кәсіпкерлерді қолдау орталықтары ашылатын болыпты. «Біз 2015 жылы алды­мызға үлкен мақсат қойып отыр­мыз. Бұйыртса, үстіміздегі жылы республикадағы барлық аудан­дарда кәсіпкерлікті қол­дауға арналған толыққанды ор­талықтар ашамыз. Онда кә­сіпкерлерге «бір терезе» қағи­да­сы бойынша қыз­мет көр­сетіледі», деді Н.Әлтаев. Оның айтуына қарағанда, орталық көрсететін қызметтер тізі­мі ауқымды. Онда мар­кетингтік, заңдық, есептік, бизнес-жоспар жасау бойынша, салық салу бойынша, рұқсаттама құжаттар алу және басқа да қызмет түрлері көрсетіледі. Жоба бойынша осы орталықтар базасында әр ау­дан­да кәсіпкерлерге арналған мектептер есігін ашады. Онда тәжі­рибелі мамандар жас кәсіп­керлерді бизнестің қыр-сырымен таныстырады. Сөйтіп, өз ісін жаңа ашқан кәсіпкерлер тәжірибелік курстардан өтеді. Тіпті, онда нақты пәндер бойынша білім беру де жоспарланыпты. Мысалы, біреу жылыжай салып, онда көкөніс өсіргісі келсе, сол жердегі мамандар оған бұл істі неден бастап, жұмысты қалай жүргізу керек екенін түсіндіреді екен. Ал, 2014 жылы мұндай орталықтар облыс орталықтарында ашылып, оларда 15 мыңнан ас­там кә­сіп­керге көмек қолы созылыпты. Нұрбай ЕЛМҰРАТОВ, «Егемен Қазақстан».