Фото:ҚФФ-ның баспасөз қызметі
Меморандумға Қазақстан футбол федерациясының президенті Әділет Барменқұлов пен inDrive компаниясының негізін қалаушы Арсен Томский қол қойды. Тараптардың ынтымақтастығы балалар арасындағы футболдың дамуына әсер етеді.
Ынтымақтастықтың негізгі мақсаты - UEFA-ның «D» және «C» лицензиясын алу үшін бапкерлік курсын өткізу, сондай-ақ коммерциялық емес Supernovas футбол жобасы аясында Қазақстанның алыс шалғайындағы ауылдар мен қалалардағы балаларды футболға баулу.
«Бұл серіктестікті еліміздегі балалар футболының дамуына үлкен қадам деп білемін. inDrive компаниясымен серіктес атанғанымызға қуаныштымыз және бұл серіктестік бұқаралық деңгейде футболды дамытуға жағдайды жақсартуда өз жемісін беретініне сенімдімін», деді Әділет Барменқұлов.
Қос тараптың өкілдері түрлі іс-шаралар, конферения мен семинарларға қатысады.
«inDrive үшін әділетсіздікпен күресіп, шалғайдағы ауыл-аймақтың балаларына спортпен шұғылдануға мүмкіндік беру өте маңызды. Біздің Supernovas жобамыз ойыннан ләззат алып, қауіпсіз және қолдауға толы ортада дамуға бағытталған. Қазақстан футбол федерациясымен жемісті серіктестігіміздің басталуын асыға күтеміз», деді inDrive компаниясының негізін қалаушы Арсен Томский.
Supernovas жобасы Қазақстанның барлық аймағынан келіп түскен өтінішті қабылдап, жақын уақытта жаңа локациялар жайлы хабарлайды.
Еске сала кетейік, 2022-2023 жылдары inDrive жоба аясында Қазақстанның тоғыз қаласында, нақтырақ айтқанда: Жәнібек (БҚО), Зеренді (Ақмола облысы), Ұлытау (Ұлытау облысы), Алтай (ШҚО), Благовещенка (СҚО), Талғар (Алматы облысы), Шалқар (Ақтөбе облысы), Ынтымақ (Түркістан облысы), Форт-Шевченкода (Маңғыстау облысы) футбол секцияларын ашты.
Қырмызы ЖҰМАҒАЛИҚЫЗЫ,
ЕҰУ студенті
