Коллажды жасаған – Зәуреш СМАҒҰЛ ,«EQ»
Бізде ұлттық экономиканы дамытуда өзіндік үлесі бар креативті индустрияның сәулет, сән, өнер, музыка, дизайн, кино, IT-технология мен халық қолөнері секілді шығармашылық бағыттары жұмыс істейді. Бұған дейін аталған экономиканың нақты анықтамасы мен тізбесі болмаған. Тек Үкіметтің өткен жылғы 6 маусымдағы №448 қаулысымен осы қызмет түрлерінің тізбесі бекітілді. Оған 43 экономикалық қызметтің жалпы жіктемесі енгізілді. Қазір 32 мың кәсіпкерлік субъектісінде 300 мыңға тарта адам жұмыс істейді. Негізгі капиталға салынған инвестиция 35 млрд теңгеге жуық болса, ел экономикасына қосқан үлесі – шамамен 2,7 пайыз.
Жалпы, ұлттық даму жоспарында жаңа жұмыс орындарын құрып, креативті һәм білімді жастарды жұмыспен қамту міндеттері көзделген. Оған қоса, Ұлттық экономика министрлігі креативті индустрияны дамытуда ІЖӨ-ге салымды 3 пайызға, жұмыспен қамтылғандардың үлесін 4 пайызға дейін ұлғайтып, шағын және орта бизнес санын 80 мың бірлікке дейін жеткізуге, сонымен қатар өнім экспортын 200 млн долларға арттыруға мүмкіндік беруге тиіс деген болжам жасайды. Қалай десек те алдағы жылы креативті индустрияның ел экономикасына қосқан үлесі 5 пайызға жетуі керек.
Таяуда Санкт-Петербург қаласында өткен халықаралық экономикалық форумда «Шығармашылық бастамалар мен мәдени мұра қоғамдық қоры» өз жұмысын таныстырды. Ондағы жалпы мақсат – шығармашылық кәсіпкерлік саласында білім беру, консалтингтік қызмет көрсету, халықаралық қызметтерді ілгерілету мен осы саладағы ғылыми-зерттеу және талдау қызметтерін жариялау арқылы Қазақстан мен Еуразиялық экономикалық одақ елдері (ЕАЭО) арасында креативті экономика және креативті индустрияны дамытуға жауапты ұйымдармен қатарласа тиімді ынтымақтастық қарым-қатынас орнату. Бұл қор халықаралық экономикалық форум аясында Ресей шығармашылық индустрия федерациясымен экономика саласындағы халықаралық ынтымақтастық туралы келісімге алғаш рет қол қойды. Келешекте екі тарап өзара тәжірибе алмасуды, кәсіпкерлер арасында шығармашылық және іскерлік байланысты одан әрі нығайтуды жоспарлайды.
«Мұндай серіктестік екі ел арасында бизнесті тиімді дамытып қана қоймай, халықаралық нарықта өз позициясын айқындауға мүмкіндік алады. Аталған саланы дамыту бойынша ұсыныстар, стратегиялар мен бағдарламаларды әзірлеу ынтымақтастықтың маңызды бағыты болмақ», дейді қор негізін қалаушы, сәулетші Дина Абдрахмет.
Сонымен қатар еларалық білім беру мен ақпараттық-түсіндіру бастамаларын дамыту да ойда бар екендігін жеткізді.
Ресей креативті индустрия федерациясының бас директоры Игорь Намаконов қазір әртүрлі бағалау бойынша, 2030 жылға қарай ІЖӨ-нің 10 пайыздан астамы әлемдік креативті салаларға тиесілі болатындығын, ал шығармашылық өндірістің өзі Батыстан БРИКС-ке (Бразилия, Ресей, Үндістан, Қытай және Оңтүстік Африка Республикасы, т.б.) мүше елдерге көбірек ауысып жатқанын атап өтті.
Форум Қазақстан мен Ресей арасындағы креативті индустрияны қолдауда халықаралық ынтымақтастықтың алғашқы әрі табысты тәжірибесінің негізін қалағандай. Сонымен бірге, қор Стратегиялық бастамалар агенттігімен келісімге отырып, екі елдің креативті экономикасын зерттеу бойынша ақпараттық алмасу, креативті индустрияларды дамыту, стратегияларды әзірлеу кезінде кеңесіп, жобалар мен бағдарламаларды бірлесе жүзеге асыратын болды. Аталған агенттік қазірдің өзінде отандық әріптестерімен шығармашылық индустрияны дамытудың өңірлік стандартын енгізу тәжірибесін бөлісуге дайын.
