Алыстағы елмен де араласамыз

Кеше Қазақстан Республикасының Сыртқы істер министрі Ерлан Ыдырысов Венесуэла Боливариан Республикасының Халықаралық қатынастар жөніндегі министрі Дельси Родригеспен оның Астанаға ресми сапары шеңберінде келіссөз жүргізді. Бұл Венесуэла сыртқы саясат ведомствосы басшысының Қазақстанға жасаған алғашқы сапары екенін айта кету керек. Кездесу барысында тараптар экономика, сауда, инвестиция, энергетика және халықаралық ұйымдар шеңберінде өзара ықпалдастық мәселелерін талқыға салды. Е.Ыдырысов өз сөзінде екі ел арасындағы ынтымақтастықтың артып келе жатқандығына назар аударта келіп, жаңа әріптестер ретінде қатынастарды тереңдету жоспарына екпін берді. Бұл тұрғыдан келгенде, Қазақстан мен Венесуэла сыртқы саясат ведомстволары басшыларының Саяси консультациялық тетігін орнату жөніндегі өзара түсіністік туралы меморандумға қол қоюы маңызды. Сондай-ақ, екі ел көпжақты пішімде де өзара ықпалдасып келеді. Атап айтқанда, Венесуэла – еліміздің 2017-2018 жылдарға БҰҰ Қауіпсіздік Кеңесіне тұрақты емес мүшелігіне кандидатурасын және Астанада ЭКСПО-2017 халықаралық көрмесін өткізу бастамаларын қолдаған ел. Қазақстан да Венесуэланың БҰҰ Қауіпсіздік Кеңесіне тұрақты емес мүшелігін қолдағандықтан, еліміз сыртқы саясат ведомствосының басшысы өз әріптесін үстіміздегі жылдың қаңтарынан бастап мәртебелі мейманды мүшелікке қабылданғандықтарымен де құттықтады. Еліміз сыртқы саясат ведо­м­ство­сының басшысы сөз реті кел­генде Қазақстан мен Венесуэла интеграциялық қадамдардың қолдаушысы екенін де ортаға сала кетті. Оның айтуынша, Венесуэла Латын Америкасы құрлы­ғын­да интеграциялық алаңдар­дың бел­сенді қатысушысы болса, Қазақстан басшысы Еура­зия кеңістігіндегі интегратор болып табылады. Олай болса, мұн­дай игі қадамдар елдер ара­сындағы экономикалық және инвес­тиция­лық байланыстарды артты­рудың факторы да. Осы тұрғыдан кел­генде, жаңадан іске кіріскен Еура­зиялық экономикалық одақ оған қосымша мүмкіндіктер береді. Оның үстіне, Қазақстан мен Венесуэла мұнай-газ өндіруші елдер болғандықтан, осы салада да ынтымақтастық аса маңызды. Тіпті, Қазақстанға осы елдің мұнай-газ саласының министрі ере келгені де белгілі болды. Жалпы, бұл сапар өзара ықпалдастыққа бастайтын мүмкіндіктер туғызуы тиіс. Қазақстандық әріптесінің сөзін қуаттаған Дельси Родригес бұл сапардың елдер арасындағы ынтымақтастыққа оң серпін береріне сенім білдірді. Артынан Қазақстан мен Венесуэла сыртқы саясат ведомстволарының Саяси консультациялық тетігін орнату жөніндегі өзара түсіністік туралы меморандумға қол қою рәсімі болып өтті. Асқар ТҰРАПБАЙҰЛЫ, «Егемен Қазақстан».