Солтүстікқазақстандық тұрғынның көрер жарығы бар екен

ПЕТРОПАВЛ.19 қаңтар. Солтүстік Қазақстанның Мамлют ауданына қарасты Воскресенка ауылының 30 жастағы тұрғынын өлім аузынан төтенше жағдай қызметкерлері мен шекарашылар құтқарып қалды. Бұл туралы облыстық төтенше жағдайлар департаментінің баспасөз қызметі хабарлады. Көрші ауылдан жем алып келуге кеткен жігіттің орта жолда тракторы істен шығып, ақ түтек боранда қалып қояды. Денесін аяз қарып, аяқ-қолы жаурай бастайды. Кабинада отқа жағып, жылынбақ болып күйіп те қалады. Оның кешікккенінен секем алған туыстары дабыл қағып, шекарашылар бекетінен жәрдем сұрайды. Алайда із, кесу сәтсіз аяқталады. Тек ауданнан жедел жеткен төтенше жағдай қызметінің өкілдерімен бірлесіп, ауылдан 12 шақырым жерде сынып қалған трактор мен иесін іздеп табады. «Трактор бұзылғаннан кейін бакта қалған жанармайға біраз жылынып отырдым. Ол таусылған соң аяқ-қолым әбден қатып қалды. Өмірден түңіліп, асылып өлгім келді. Құтқарушыларға алғысым шексіз. Көрер жарығым бар екен», дейді Ресей мен Қазақстан арасындағы шекарадан таяқ тастам жерде адасып кеткен Бақыт Ахметов. Қолы күйіп, денесінің үсік шалғанын елер емес, дін аман оралғанына қуанышты. Қыс кәріне мінгелі облыс құтқарушылары мен шекарашылар 900-ден астам адамды, 300-ге жуық техниканы қар құрсауынын құтқарған. Өмір Есқали. Дерек: Солтүстік Қазақстан облыстық төтенше жағдайлар департаментінің баспасөз қызметі. Сурет: news.nur.kz.