Ақтөбеде қар тазалау жұмыстары қарқынды жүріп жатыр

АҚТӨБЕ. 17 қаңтар. Ақтөбе өңірінде қыс жылдағыдан ертерек түсті. Соңғы кездері  жапалақтап жауған қар қала көшелерін толтырып үлгерді. Осыған байланысты «Ақтөбе қалалық тұрғын үй-коммуналдық шаруашылық, жолаушы көлігі және автомобиль жолдары» бөлімі мен қар тазарту жұмыстарымен айналысатын мекемелер жұмысқа қызу кірісіп кетті. Бұл туралы egemen.kz тілшісі хабарлады. Биыл қала көшелерін қардан тазарту жұмыстарына 92 миллион теңге қаржы бөлініп, бұл бағыттағы шаруаларды жүзеге асыру он бес мекемеге жүктелген екен. Олар – «Тазалық», «Ақжол», «Ерхат жолдары», «Бошан трансавто», «РКДС», «Ақтөбеспецстрой», «Елім Ақтөбе», «Дорожник», «Ақтөбе – таза қала», «КТП», «АГДС», «Алға-жолсистемс», «Табыс-Ақтөбе», «Коквест» жауапкершілігі шектеулі серіктестіктері мен «Матай» шаруа қожалығы. Ал өткен жылы бұл шаруаларды тоғыз мекеме атқарған болатын. Қардың мол түсуіне байланысты кейбір мекемелер өздеріне қарасты аумақты тазартып үлгере алмағандықтан биыл мекеме саны өсіпті. Қазір қалада тәулік бойы кезекшілік ұйымдастырылып, тиісті мекемелер көше қарларын тазартып жатыр. Қараша айынан бастап осы кезге дейін дейін 3 мың тоннаға жуық қар қала сыртына шығарылған. Сатыбалды Сәуірбай. Дерек: egemen.kz. Сурет: diapason.kz.