Аймақтар • 17 Маусым, 2024

Оралдағы жарылыс: төрт адам жансақтау бөлімінде

66 рет
көрсетілді
2 мин
оқу үшін

Құрбан айттың алғашқы күні Орал қаласындағы «Ел ырысы» базарында газ балоны жарылып, 10 адам зардап шекті. Жарылыс құрбанға сойылған малдың бас-сирағын үйту үшін пайдаланылған газ балонынан шыққан, деп хабарлайды Egemen.kz.

Оралдағы жарылыс: төрт адам жансақтау бөлімінде

Оқыс оқиға туралы хабар жедел жәрдем операторына 16-маусым күні таңертеңгі сағат 09:49-де түскен. Дәрігерлерден құралған 5 бригада оқиға орнына 5 минуттың ішінде жетіп үлгерген.

«Зардап шеккендер – барлығы 10 адам, олардың 2-еуі кәмелетке толмаған ер бала, ересектердің жас шамасы 27-67 аралығында», деп хабарлады Батыс Қазақстан облыстық денсаулық сақтау басқармасының баспасөз қызметі.

Бір тәуліктен кейінгі жағдай мынадай: қазіргі уақытта 3 ересек адам реанимацияда, 4-еуі политравма бөлімшесінде және екі жасөспірім көпбейінді облыстық балалар ауруханасында қажетті ем алуда. Жасөспірімнің біреуі – жансақтау бөлімінде, біреуі политравма бөлімшесінде жатыр.

Науқастардың хәлін денсаулық сақтау басқармасының басшысы Мадияр Өтешев, басшының орынбасары Гүлнәр Әбдірахманова, ДСБ бас штаттан тыс травматологы Серік Қарекенов және қалалық көпбейінді аурухана директоры Арман Мырзахметов арнайы барып көрді. Тиісті мамандардың қатысуымен консилиум өткізілген. Сондай-ақ, Астана және Алматы қалаларының Апаттар Медицинасы Орталығы реаниматологтарымен және комбустиологтарымен бірлесіп телемедицина жүргізілген. Қазір келісілген емдеу тактикасы бойынша ем-шара жүргізіліп жатыр .

Батыс Қазақстан облысында соңғы күндері күн райы өте ыстық, 40 градусқа жақындап тұр. Төтенше жағдайлар департаменті жоғары өрт қаупі қатерін күн сайын хабарлайды. Үш күнге созылатын құрбан айт кезінде қауіпсіздікті сақтау туралы ҚМДБ-ның Батыс Қазақстан облысындағы өкіл имамы Самат Әлібаев та үндеу жасады.

Қазір халық көп жиналатын қоғамдық орындарда, құрбан айт шалынып жатқан қасапханаларда қауіпсіздік шаралары күшейтілді.