Фото: ҚР Көлік министрлігінің баспасөз қызметі
Қазақстан делегациясын Азаматтық авиация комитетінің төрағасы Салтанат Томпиева, Қытай делегациясын Қытай азаматтық авиация әкімшілігі халықаралық қатынастар департаменті бас директорының орынбасары Бай Венли бастады.
Келіссөздер барысында екі елдің бекітілген тасымалдаушыларының рұқсат етілген жиіліктер санын аптасына 124 рейске дейін ұлғайту және жиіліктер бойынша қандай да бір шектеусіз жүк рейстерін орындау мүмкіндігі жөнінде ынтымақтастыққа қол жеткізілді.
Сонымен қатар тасымалдаушылар саны артып, Қытай аумағында жаңа пунктер қосылды.
Өз кезегінде отандық авиакомпаниялар Хайнань аралындағы (Санья, Хайкоу және Цюнхай қалалары) пункттрге, оның ішінде бесінші, алтыншы және жетінші «ауа еркіндігін» пайдалана отырып, шексіз рейстерді орындайды.
Келіссөздер нәтижесінде екі ел арасында алғаш рет «ашық аспан» режимі орнатылды. Оның шеңберінде екі елдің тағайындалған тасымалдаушылары «ауа еркіндігінің» бесінші дәрежесін пайдалана отырып, аптасына 42 рейске дейін орындау құқығына ие болды.
Айта кетерлігі, ҚР тасымалдаушылары «ауа еркіндігінің» бесінші дәрежесін пайдалана отырып, Қытайға рейстерді орындау құқығына ие болған әлемдегі санаулы елдердің бірі (АҚШ және бірқатар Еуропа елдері).
Қытай Қазақстанның көптеген бағыты бойынша стратегиялық серіктесі, осыған байланысты елдер арасындағы рейстерді орындау үшін құқықтық базаны кеңейту ынтымақтастықты одан әрі дамыту жолында маңызды қадам болды.
Қырмызы ЖҰМАҒАЛИҚЫЗЫ,
ЕҰУ студенті
