Жұмысқа орналасудың жаңа жобасы

Аталған жобаның негізгі ерекшелігі – мамандар азаматтардың келуін күтпей, керісінше, сауда орталықтары секілді адам көп жүретін жерлерге шығып, кеңес береді. Бұл бағытта өңірлерде атқарылып жатқан шаралар Премьер-министрдің орынбасары Тамара Дүйсенованың төрағалығымен өткен кеңесте талқыланды.

Қарағанды облысында жоба 25 маусымнан бастап жүзеге асырылып жатыр. Төрт бірдей кеңес беру пункті ашылған. Олардың үшеуі облыс орталығында, біреуі Теміртау қаласында орналасқан. Мұнда арнайы оқытылған 8 маман қызмет көрсетеді.

«Жоба аясында 15 маусымда комьюнити-орталық ашылды. Мұнда жастар үшін дыбыс және подакст жазу студиялары жұмыс істей­тін болады. Яғни оларға креативті өнім шы­ғаруға қатысты тренингтер ұйымдастыры­лып, дағ­ды­ларды игеруге мүмкіндік беріледі. Біз, сон­дай-ақ көмекке жүгінген азаматтар­ға 5 кол­ледж базасында қысқамерзімді оқу курс­тарын ұсынып отырмыз. 1 тамыздан бас­тап, меңгеретін мамандықтардың күрделілі­гіне қарай ұзақтығы 5-30 күн аралығындағы курс­тар ұйымдастырылады. Соңында серти­фикат табысталып, жұмысқа орналасты­рылады», деді облыс әкімінің орынбасары Ермек Алпысов.

Сонымен қатар өңірде 60-50-50 нөмірлі байланыс орталығы да жұмыс істеп жатыр. Қолданушылардың ыңғайлылығы үшін Телеграм-арна іске қосылған.

Алматы жобасы аясында құрылған Teleg­ram-бот өзіндік ақпараттық жүйе іспетті. Мұнда жазған азаматқа бірден бос жұмыс орындары мен тегін онлайн-курстар тізбесі ұсынылады. Ол үшін бот «jasalmaty.kz» жастар порталымен интеграцияланған. Қызметтер азаматтарға проактивті режімде ұсынылады.

«Біз Астанада жүзеге асып жатқан «Jol Tap» негізінде жұмыс істеуді ұйғар­дық. Алайда Алматы ерекшеліктерін ескере отырып, бірқатар талапты өзгерттік. Қаладағы 8 комьюнити-орталықта кеңес беру нүктелері ашылды. Оған қосымша ірі сауда орталықтары ішінен 3 пункт ұйым­дастырылды. Жобаны толығымен 1 шілдеден бастап жүзеге асыруға дайынбыз», деді қалалық жұмыспен қамту және әлеуметтік бағдарламалар басқармасының басшысы Бауыржан Жаубасов.

Шымкентте жоба 25 мамырдан бас­тап жүзеге асырылып жатыр. Осы уақыт аралығында 10 кеңес беру пунктінде 183 азамат түсіндіру жұмыстарымен қамтылды. Қала әкімінің орынбасары Сәрсен Құранбектің сөзінше, олардың бірталайы әлеуметтік көмек алушылар тізіміне тіркелсе, енді бірі тұрғын үй кезегіне қойылған. Бірқатар азамат кәсіптік оқыту шараларымен қамтылды.

Ал Ақтөбе облысында жоба арқылы жұмысқа орналастырудың 2 нұсқасы жүзеге асырылмақшы. Облыстың жастар саясаты басқармасының басшысы Мирхан Ермағанбетовтің айтуынша, бүгінде өңірдегі шағын және орта бизнес өкілдерімен келіссөздер жүргізілген. Нәтижесінде, 40 кәсіпкер жобаға қатысушылар үшін шеберлік сағаттарын өткізіп, кейін оларды жұмысқа орналастыруға келіскен.

«Сондай-ақ біз индустриалды даму басқармасы арқылы өнеркәсіп орындарын­дағы вакансияларды ұсынбақпыз. Қазіргі таңда алдын ала келісім бар. Бұл ретте еңбек мо­биль­ділігі орталығының мүмкін­діктерін пай­далану көзделіп отыр», деді М.Ермағанбетов.

Өңірде жоба 15 шілдеден бастап жүзеге асырылмақшы. Оның шеңберінде облыс орталығының халық көп шоғырланған аумақтарында 5 модульді пункт орнату қарастырылған.

«Жоба әр өңірдің өз ерекшеліктеріне қарай жүзеге асырылып келеді. Дегенмен оң тәжірибелермен өзара алмасу қажет деп ойлаймын. Ең негізгі мақсат – азаматтарды жұмыспен қамту. Бұл ретте барлық мүмкіндіктерді пайдалануымыз керек», деді Т.Дүйсенова.