Бір мезетте Қаламгерлер аллеясы арқа-жарқа болды да қалды. «Мазмұндама», «Kitapal» қатарлы тағы бірнеше баспа мұнда шатыр тігіп, өнімдерін қойып, кітап жәрмеңкесі ашық аспан астында қыз-қыз қайнады. Ашылғандағы мерекелік концерт сән-салтанатымен аллеядағы жұртшылықты думанға бөлеп, көңілдерін көтерді. Концерт көруге келмеген халық. Кітап алуға, авторлармен кездесуге жиналған. Негізінен балаларға арналған әдебиеттер топтастырылған. Басқа да әдебиеттер жеткілікті. «Халық кітап оқымайды» деген сөз осындай кітап жәрмеңкелерінде теріске шығады десек, артық емес.
«Kitaphana fest» кітап фестивалі – 2019 жылдан бері өткізіліп келе жатқан қалалық ауқымдағы тұңғыш кітап фестивалі. Бүгінгі таңда фестиваль аясында Қазақстанға белгілі авторлар мен баспалардың қатысуымен бірнеше кітаптың тұсауы кесіліп, оқырманға таныстырылған. Сол арқылы халықтың кітап оқуға деген қызығушылығын арттыру, кітап оқуды кеңінен насихаттау, қоғамның мәдени деңгейін көтеру, белгілі ақын-жазушылармен кездесу ұйымдастыруды көздейді. Осы жолы да авторлар оқырмандарымен қауышып, емен-жарқын әңгіме-дүкен өрбіді.
Кейбір ата-ана балаларына алған кітабына автордан қолтаңба қойдырып алды. Атап айтқанда, балалар ақындары Әкім Ысқақ пен Серікбол Хасан кітаптарының тұсаукесер рәсімі жасалып, оқырмандарға бір уақытта жол тартып жатты.
