Мемлекеттік құрылымдар да, қарапайым тұрғындар да қамшының өріміндей бірігіп, қоян-қолтық жұмыс істеді. Әсіресе Қазақстанның 11 облысынан, 3 қаладан келген әскери қызметшілер ең қиын жерде, су тасқынымен бетпе-бет келген қауіпті нысандарда жүрді.
– Орал қаласында орналасқан Ұлттық ұланның «Батыс» өңірлік қолбасшылығына қарасты 5517 әскери бөлімінің жауынгерлері алғашқы күннен-ақ су тасқынының алдын алуға кірістік. Жеке құрам әуелі су басу қаупі жоғары жерлерде арнайы бөгеттер құрып, көшелер мен аулаларда жиналып қалған қарды шығарып, судың өз арнасымен жүруі үшін арықтарды тазалады. Кейін тікелей құтқару жұмыстарымен де айналыстық, – дейді 5517 әскери бөлімінің батальон командирі, майор Жасұлан Көрпешов.
Осынау тарихи күндері ерекше ерлігімен көзге түсіп, адам өміріне араша түскен сарбаздар да бар.
Сәуірдің 21-і күні Орал қаласының іргесінде, Жайық өзені жайылмасында орналасқан саяжай аумағында тасқын су жасанды бөгетті бұзып өтті. Бірнеше күннен бері суды бөгеп, құм салынған қапшықтан қорған тұрғызып жүрген саяжай тұрғындары күн санап екпіні күшейген ағын суға қарсы тұра алмады. Оқиға орнында жүрген Ұлттық ұлан жауынгерлері мен полиция қызметкерлері халықты қауіпсіз жерге көшіруге кірісті. Осы кезде қатты ағыс бір азаматты ағызып алып кетті. Дереу көмекке ұмтылған ұландықтар тізбектеле шынжыр жасап, суға кетіп бара жатқан 60 жастағы саяжай тұрғынын аман алып шықты. Қысылтаяң сәтте абыржымай, бірден алға ұмтылған 5517 әскери бөлім қызметкері, ефрейтор Нұрбол Асқап пен полиция қызметкері, кіші сержант Әміржан Бірлесов болатын.
Нұрбол Асқап су тасқыны кезінде ерекше ерлігімен, еңбегімен көзге түскен азаматтар қатарында «Жауынгерлік ерлігі үшін» медалімен марапатталды. Награданы Астанада өткен салтанатты жиында Мемлекет басшысының қолынан алды.
– Президент Қасым-Жомарт Тоқаевтың қолынан осындай жоғары марапат алып, құрметке ие болғаныма қатты қуандым. Тұла бойымды мақтаныш пен қуаныш тербеп, өзіме өзім сене алмадым. Ол сәттегі толғанысты сөзбен айтып жеткізу мүмкін емес. Бұл медаль мен үшін ыстық, өйткені Ұлттық ұлан қатарындағы алғашқы наградам, – дейді Нұрбол жауынгер.
5517 әскери бөлімнің тағы бір қызметкері Мәулен Мәрленов те топан судың ортасында қалып қойған жүк көлігін алып шығып, 30-ға жуық адамды құтқарды. «Біз №1-2 саяжай аумағында тұрғындарды эвакуациялап жүрген едік. Бір кезде су ортасында құрып қалған жүк көлігін байқадым. Машина оталмай, моторы өшіп қалыпты. Қорабында адам толы. Судың ағысы күшейіп, дөңгелектен асып бара жатты. Тез арада өз көлігіммен барып, тіркеп, қауіпсіз жерге алып шықтым», дейді Мәулен.
Мәулен – Алматы облысының тумасы, Еңбекшіқазақ ауданы Өрікті аулында дүниеге келген. 2014 жылы Отан алдындағы борышын өтеу үшін әскерге шақырылып, Орал қаласындағы Ұлттық ұланның 5517 әскери бөліміне түскен екен. Ақжайық топырағы Мәуленге құтты қоныс болды. Осы әскери бөлімде келісімшарт бойынша жұмысқа қалды. 2019 жылы жары Мақпалмен отау құрды. Қазір жас шаңырақта Дамир есімді ұл өсіп келеді.
«Мен өзімнің іс-әрекетімді ешқандай батылдық немесе ерлік деп санаған емеспін. Біз әскери қызметкерміз ғой. Кез келген қиын қыстау сәтте халықпен бірге болып, көмекке әзір болуымыз қажет. Бұл – менің күнделікті қызметім», дейді М.Мәрленов.
– Біздің бөлімнің әрбір қызметкері, кез келген жауынгер дәл осылай айтатынына сенемін. Өйткені олар – шын мәнінде, Отан қорғаушы сарбаздар. Мереке күні біз командирлеріміздің қолынан марапат алып тұрып: «Қазақстан Республикасына қызмет етемін!» деп салтанатты түрде мәлімдейміз, – деді Ұлттық ұлан «Батыс» өңірлік қолбасшылығы баспасөз қызметінің өкілі, лейтенант Бақдәулет Манарбек.
Батыс Қазақстан облысы
