фото: senate.parlam.kz
Соттағы кездесуде заңнамадағы сот жүйесін реформалау және құқық қолдану жөніндегі өзгерістер талқыланды. Н.Бекназаров Президенттің тапсырмасынан туындайтын міндеттерді іске асыру туралы айта келіп, Парламент қабылдаған заңдар және «Қазақстан Республикасының сот жүйесі мен судьяларының мәртебесі туралы» Конституциялық заңға енгізілген өзгерістер туралы әңгімеледі.
«Қабылданған заңдар, ең алдымен, қоғамның сотқа деген сенімін күшейту үшін әділ сот төрелігін, сондай-ақ азаматтар құқығының қорғалуын және сот пен сот рәсімдерінің заманауи талаптарға сай болуын қамтамасыз етуге арналған», деді сенатор.
Полиция департаментінде қоғамдық қауіпсіздікті қамтамасыз ету және құқық бұзушылықтың алдын алу мәселелері сөз болды. Полиция департаментінің бастығы сенаторға қаладағы қылмыстың 24,8%-ға төмендегені туралы баяндады. Сонымен қатар жергілікті полиция департаменті жұмысының тиімділігін арттыру туралы тың шешімдер қабылдау қажеттігін, олардың бірі полиция қызметкерлерінің санын көбейту екенін атап өтті. Сенатор өз кезегінде құқық қорғау жүйесіндегі реформалардың және құқықтық мемлекетті нығайтудың маңыздылығына тоқталды.
Н.Бекназаров азаматтарды жеке де қабылдады. Онда көшелерге ардагерлердің есімдерін беру, бизнесті қолдау, жұмысқа орналастыру және денсаулық сақтау мәселелері талқыланды.
«Мұндай кездесулер өте маңызды. Біз Президент тапсырмаларының орындалуын қадағалап қана қоймай, халықты толғандыратын мәселелерге де назар аударамыз. Барлық көтерілген мәселелер қолданыстағы заңнама аясында қаралып, шешілетін болады», деп атап өтті депутат.
