Курчатовта «Мерейлі отбасы» байқауының жеңімпаздары дауыс берді

ӨСКЕМЕН. 26 сәуір. Былтыр елімізде өткен жалпыхалықтық «Мерейлі отбасы» байқауының Шығыс Қазақстан облысы бойынша жеңімпазы және республикалық кезеңінің қатысушылары атанған Паницкийлер отбасы да президенттік сайлауда өз таңдауларын жасады. Бұл туралы egemen.kz тілшісі хабарлады. Андрей мен Динара Паницкийлер Қазақстан Республикасы Президентін сайлау күні отбасылық мереке іспетті болғанын айтады. Олар ертеңгілік балаларын киіндіріп алып, өздері тұратын Курчатов қаласының №294 сайлау учаскесінде дауыс берді. «Мен төрт баланың анасымын. Шүкір, жанымда жақсы көретін жарым мен балаларым, тұрақты жұмысым мен еңбекақым бар. Күйеуімнің ұлты – орыс, өзім қазақпын. Алайда, біз үшін ұлттық ерекшеліктеріміз кедергі болған емес. Өйткені, біз – қазақстандықпыз! Біз отбасылық мерекелерімізде ұлтымыздың дәстүрі мен салтын құрметтеп, балаларымызға үйретіп отырамыз. Сондықтан, бүгінгі қол жеткізген табыстарымыз қоғамымыздағы достық, бейбітшілік пен келісімсіз жүзеге аспаған болар еді деп ойлаймын. Күйеуімді әулетіміздің басшысы ретінде сыйлаймын. Өзім шексіз жақсы көретін балаларымның келешегіне үлкен үміт артамын. Еліміздің қазіргі жан-жақты жүргізіп отырған саясаты біздің болашаққа деген берік сенімімізді қалыптастырды. Сол себепті отбасымызбен сайлау учаскесіне келіп, өз таңдауымызды жасадық», – дейді Динара. Ал Андрей сайлау учаскесіне сайлаушылардың мол жиналғанын, олардың арасында көршілері, таныстары, достары мен бірге жұмыс істейтін әріптестері бар екенін жеткізді. «Менің ойымша, Курчатов тұрғындары күллі қазақстандықтар сияқты сайлауға белсенді түрде қатысты. Еліміз үшін әр дауыс маңызды. Біз де еліміздің, балаларымыздың болашағын таңдау жолында дауыс бердік», – деді ол. Думан Анаш, Дерек, сурет: egemen.kz.