Бұл көрме «Атамекен» өнер ордасының мәдени құндылықтарды сақтау, тәжірибе алмасу және серіктестік жобалары аясында ұйымдастырылған екен. Ерекше көрменің ашылуына Мәдениет саласының үздігі, Суретшілер одағы Маңғыстау облыстық филиалының төрағасы Бақытжан Құлбай арнайы келді. Мейманды Батыс Қазақстан облысы мәдениет, тілдерді дамыту және архив ісі басқармасы басшысының орынбасары Медхат Мұсаұлы қарсы алып, өңірлер арасындағы шығармашылық байланысты нығайтқаны үшін алғысхат пен естелік сыйлық тарту етті.
Көрмеге маңғыстаулық 31 суретшінің 70-тен астам туындысы қойылған. Бақытжан Құлбайдың айтуынша, Маңғыстау суретшілері қанық бояу тілін шебер меңгерген. Жұмыстар түрлі жанрда жазылған. Олардың ортақ тақырыбы – адам тағдыры, соның ішінде қазақтың өмірі. Бұл көрме – үйлесімді әлемнің, бізді қоршаған ортаның, өмірдің шексіз сән-салтанатының көрінісі, дейді мейман.
«Атамекен» өнер ордасының директоры Бауыржан Халиолла мұндай суретшілер көрмесі болашақта да жүйелі, дәстүрлі түрде ұйымдастырылатынын айтады.
Батыс Қазақстан облысы
