Көрнекті қаламгерден мұра болып қалған бұл жәдігердің ерекшелігі, кітаптың түпнұсқасы еліміздің өзге кітапханалары мен музейлерінде сақталмаған. Кітап А.Байтұрсынұлы қарпінде 1948 жылы жарық көрген. Басылып шыққан орны – Қазақтың мемлекеттік баспаханасы, «Қазақ елі» журналының баспасы деп көрсетілген. Жинақта ақынның өлеңдері топтастырылған. Атап айтқанда, «Ана сабағы» дастаны, «Алғашқы адым», «Жолда», «Қуаныш», «Біздің ауыл», «Темір ат», «Шеңбер», «Ана толғауы», «Қырманда», «Ұстаз», «Біздің заман» және тағы басқа өлеңдері басылған. Кітап шамамен 200 беттен тұрады, парақтары жақсы сақталған.
Жәдігерді ақынның жиен-немересі Айдар Қырықбайұлы музейге аманаттады.
Музей басшысы Ербол Қайыров бұған қоса 1939-1945 жылдар аралығында Жамбыл Жабаевқа әдеби хатшылық қызмет атқарған Ғали Ормановтың күнделігі де қоса беріліп отырғанын хабарлады. Мекеме ұжымы оны жыр алыбының 180 жылдығында көрсетеміз деп отыр.
Ғали Орманов (1907-1978) — бүкіл саналы ғұмырында ұлттық әдебиетіміздің өсіп-өркендеуіне, қазақ поэзиясының дамуына ерекше үлес қосқан ақын. Орыстың, Шығыстың классикалық үлгілерін аударып, қазақ әдебиеті саласына өлшеусіз үлес қосқан аудармашы. Оның қаламынан қазақ әдебиетінің алтын қазынасына өлеңдер жинақтары, поэмалары, жыр кітаптары, прозалық шығармалары жарық көрген.
Павлодар облысы
