Ауылдың әрін келтіріп, көз тартатын тамаша сыйлықты арнайы жасатып, туған аулына сыйға тартқан Қадыр Мырзалиев атындағы мектептің 2004 жылғы түлектері болып шықты. Биыл олардың орта мектепті бітіргеніне 20 жыл толып жатыр. Жалпы, мектеп түлектерінің туған жеріне осындай ерекше сыйлық жасауы өңірде жақсы дәстүрге айналып келеді.
Ұлттық оюлармен әрі шамдармен безендірілген, күндіз де, түнде де көз тартатын әдемі сағатты оралдық шебер әрі кәсіпкер, «Daryn» шеберханасының иесі Жарас Сүндетов жасаған екен.
– Жымпиты аулының 1986-1987 жылы туған азаматтары наурыз айындағы су тасқыны кезінде де ерлікке татитын еңбек көрсетті. Әсіресе Ермек Кәкімов, Нұрхан Әминов, Әділбек Байралиев, Бекжан Бисенғалиев, Сержан Сиықов, Фархат Тастаев, Асхат Нұрмұханов, Сайлан Жұбанов, Тарас Сәрсенов секілді азаматтарға елдің атынан алғыс айтамыз. Бүгінде Қадыр мектебінен 20 жыл бұрын түлеп ұшқан түлектер туған аулына тамаша сый жасап отыр. Мына тұғырдағы сағатқа қарап, талай адам таңдай қағары анық. Осы игі дәстүр жалғаса берсін! – деген Сырым ауданының әкімі Жұмагелді Батырниязов аталған жігіттерге Алғысхат табыс етті.
– Біз бір мектепте бес сынып болып қатар оқыған құрдастар едік. Биыл мектебімізді тәмамдап, үлкен өмірге қадам басқанымызға 20 жыл толып отыр. Осыған орай туған жерімізге ерекше бір сыйлық жасайық деген ұсынысты достарымыздың көбі қолдады. Әркім қадари-хәлінше үлес қосып, 5 млн теңгедей жинадық. Осы қаржыға ерекше көше сағатын жасатып, тарихы терең Жымпиты кентінің нақ ортасында, Ұстаздар үйінің алдына орнатып қойдық, – дейді ауыл түлегі, кәсіпкер Мұратбек Мұхамбедиев.
Батыс Қазақстан облысы
