Жылнама қайта жаңғырды
Спорттық гимнастика 1896 жылы Афинада алғаш рет ұйымдастырылған Олимпия ойындарының бағдарламасына енген. Ерлер мен әйелдерді қоса есептегенде, бұл жерде 14 жүлде жиынтығы сарапқа салынады. ХХ ғасырдың екінші жартысында шымкенттік Юрий Цапенко мен Нелли Кимнің халықаралық жарыстарда атой салғанын көзіқарақты көрермендер ұмыта қойған жоқ. Цапенко 1994 жылы Токио Олимпиадасында 1 күміс пен 1 қоланы қоржынға салды. Кимнің көрсеткіші тіптен керемет болды. Нелли 1976 жылы Монреаль, 1980 жылы Мәскеудегі додаларда 5 алтын мен 1 күміс медальды олжалады. 1988 жылы Сеулде қос жерлесіміз атой салды. Ақтөбелік Валерий Люкин 2 алтын мен 2 күмісті иеленсе, алматылық Владимир Новиков командалық сайыста жеңіс тұғырының ең биік сатысына көтерілді. Бірақ жерлестеріміздің бұл табысының барлығы да келмеске кеткен КСРО-ның еншісіне жазылды.
Тәуелсіздік алғаннан кейін де Қазақстаннан жақсы гимнасшылар шықты. Бұрын бір тудың астында болған Ресей, Беларусь, Украина, Өзбекстан, Латвия құрамалары әлем чемпионаттарында медальды «күреп» алып жатқанда, біздің жігіттер арасынан тек Сергей Федорченконың ғана бағы жанды. 1997 жылы Лозаннада қолды тіреп жасалатын жаттығуда ол бас жүлдені олжалады. Жалғыз қомақты табысымыз – осы. Өзге жерлестеріміз тәуір өнер көрсеткенімен, олжаға кенеле алмады. Ал Олимпиададан қоржынымыз үнемі бос қайтып жүрді.
Францияның бас шаһарында сол олқылықтың орны толды. Финалдық сайыста 15,433 ұпай жиған 26 жастағы Нариман Құрбанов күміс медальды еншіледі. Ол тек әлем мен Еуропаның екі дүркін чемпионы Рис Маккленаганды алға жіберді. Жерлесіміз Ирландияның дүлдүлінен небәрі 0,100 ұпай қалып қойды. Әлем чемпионы, Панамерика ойындарының жеңімпазы, америкалық Стивен Недорошик (15,300 ұпай) қола медальды қанағат тұтты. Ал Олимпиаданың 3 дүркін чемпионы, сол жарыстың 3 дүркін қола жүлдегері, 3 дүркін әлем чемпионы және сол жарыстың 5 дүркін күміс жүлдегері, ұлыбританиялық Макс Уитлок төртінші орыннан аса алмаса, Рио Олимпиадасында – 2 (1 алтын, 1 күміс), әлем чемпионатында – 5 (1+2+1), Еуропа ойындарында – 6 (3+3+0) және құрлық біріншілігінде 14 (7+3+4) рет жеңіс тұғырына көтерілген Украинаның мақтанышы Олег Верняев бесінші сатыға табан тіреді. Міне, осы мәліметтердің өзінен-ақ әкесі Хусанжан Шәріпұлының шәкірті Нариман Құрбановқа ғаламдық додада жеңіс тұғырына көтерілу үшін қандай сынақтан өтуге тура келгенін шамалай беруге болады.
Жеңіс тұғырынан түскен бетте Нариман: «Олимпиадалық цикл барысында өткен бәсекелер барысында мен бағдарлама соңында жиі құлайтынмын. Бұл менің техникалық немесе тактикалық кемшілігім емес еді. Көбіне-көп психологиялық тұрғыдан ұтылатынмын. Сол олқылықтың орнын толтыру үшін еш аянбай жаттықтым. Көп еңбектендім. Олимпия ойындарында өзімнің мол тәжірибеме арқа сүйей отырып, бар білгенімді толығымен автоматты түрде орындап шықтым. Ерен еңбек еш кеткен жоқ. Парижде күміс медальды иелендім. Қазір қуанышымда шек жоқ», деп ағынан жарылды.
