Фото:azattyq-ruhy.kz
Тараздан 300 шақырымдай жердегі Мойынқұм негізінен шөлейтті аймақ саналады. Алайда мұнда да мал шаруашылығын өрістетуге мүмкіндік бар. Мәселен, Бірлік ауылында «Байбарақ-Агро» кооперативі құрылған. Оған әзірге 30-дан астам адам біріккен. «Ауыл аманаты» бағдарламасы аясында 35,8 млн теңгеге 20-ға жуық ауыл шаруашылығы техникасы сатып алынып, ауылға қызмет көрсетіп жатыр. 400 гектар шабындық жерден ірі қара, ұсақ малға қажетті азық дайындалады. Аудан түйе шаруашылығын жүргізуге қолайлы. Бірақ шаруалар әзірге ет пен шұбат өндірумен шектеліп келеді.
Ауыл шаруашылығы кооперативінің қызметімен танысқан вице-премьер Тамара Дүйсенова ауыл тұрғындарына тауарлы несие беру тетігін қарастыру туралы атап өтті.
«Тек шағын несие арқылы көп түйе алу мүмкін емес. Сондықтан агроөнеркәсіп кешенінде тауарлы несие тетігін пайдалану маңызды. Елімізде аталған тәжірибенің сәтті жүзеге асып жатқан мысалы жетерлік. Жамбыл өңірінде сақтандыру тетігін енгізу ұсынылып отыр. Бұл тетік барлық тарап үшін тиімді деп санаймын», деді вице-премьер.
Түйе шаруашылығын жүргізуге қолұшын созуға дайын басқа өңірлерден келген кәсіпкерлер бар. Мәселен, Алматы облысында 5 мың түйе асырап, оның өнімдерін терең өңдеумен айналысатын «Дәулет-Бекет» серіктестігі жұмыс істейді.
«Түйе шаруашылығының дамуына барынша күш салу қажет. Егер жергілікті тұрғындар ниет білдірсе, 100 түйе беріп, оны баптауға қажетті кеңес беруге әзірміз. Мұнда түйе сүтін өңдеуге қажетті шағын зауыт салуға да жәрдемдесе аламыз», дейді серіктестік иесі Сыдық Дәулетов.
Шу ауданында вице-премьер ауылдық бизнесті дамытудың өндірістік бағытымен танысты. Бірлікүстем ауылының тұрғыны Нұрзат Қошқарбаев бірнеше жылдан бері кірпіш шығару ісімен айналысып, күніне мыңға жуық данасын өндіріп келген. Мемлекеттік бағдарлама аясында 8,6 млн теңге көлемінде несие алып, өндіріс қуатын екі есе арттырып отыр.
«Қазір күніне 2 000 дана шығаруға қауқарлымыз. Бұған дейін 2 адам жұмыс істеп келген еді, бүгінде 8 қызметкер бар. Өнімге сұраныс жоғары. Шудан бөлек, Мойынқұм, Меркі, Қордай аудандарынан тапсырыстар көптеп келеді», дейді кәсіпкер.
Ал Қорағаты ауылының тұрғыны Нұрғали Жексенбиев жұбайымен бірге тігін цехын ашқан. Керекті құрылғылар сатып алып, жергілікті балабақшаларға қажетті төсек жабындары, жастық қаптарын тігіп, сатып отыр. Кәсібін кеңейтуді мақсат етеді. Алайда тігінші табуда қиындықтар туындап отыр. Жергілікті әкімдік бұл мәселені мансап орталығы арқылы мамандар оқыту жағынан қолдау көрсетіп жатыр.
Вице-премьер жобаларды оң бағалап, туындаған мәселеде мемлекеттік бағдарламаның тетіктерін тиімді пайдаланып, ауылдық жерлерде өмір сүру деңгейін қалай жақсартуға болатынын тілге тиек етті.
«Қазіргі таңда «Күміс жас» бағдарламасы жүзеге асып жатыр. Одан бөлек, мемлекет тарапынан субсидияланатын әлеуметті жұмыс орындары тетігі бар. Жастар практикасы жобасын да қарастыру қажет. Жалпы алғанда ауыл тұрғындарының тұрмысын жақсартуға бағытталған бірқатар қолдау шарасы бар. Олар туралы кеңінен насихаттау қажет», деп атап өтті Т.Дүйсенова.
Жамбыл облысында «Ауыл аманаты» жобасы аясында жергілікті тұрғындарға ауыл шаруашылығын жүргізу дағдылары үйретіледі. Бұл бағыт негізінен «Қарызсыз қоғам» жобасы қатысушыларына бағытталған. Мәселен, «Amanat» партиясының бастамасымен Меркі ауданында «Агросауат» атты агробіліктілік орталығы ашылды. Нысанда егін, құс және мал шаруашылығын жүргізуге қатысты теориялық және тәжірибелік курстарды ақысыз негізде оқыту ұйымдастырылған.
Партия хатшысы Эльдар Жұмағазиев мұндай орталықтардың ауыл тұрғындарының табысын арттыру үшін маңыздылығын атап өтті. Өз кезегінде Тамара Дүйсенова бастаманы жоғары бағалап, оны одан әрі қарай кеңінен тарату мүмкіндігін қарастыру қажеттігін атап өтті.
