Іріктеу сайысы аяқталған тұста БАҚ өкілдеріне берген сұхбатында Нора: «Олимпиадаға қатысуды балауса шағымнан армандадым. Маған сондай мүмкіндік беріп, даңғыл жол ашып берген Қазақ еліне дән ризамын. Былтыр менің нәрестелі болғанымды білесіздер. Қазір балам бір жасқа толды. Декреттік демалысымды тез аяқтап, төртжылдықтың басты додасына тыңғылықты даярландым. Өйткені жауапкершіліктің жүгін жан-тәніммен сезіндім. Қазіргі кезде барша Қазақстан халқы менен жүлде күтіп отыр. Солардың сенімін ақтау үшін еш аянбаймын», деп ақтарыла сөйледі.
Ұлттық командамыздың сапындағы тағы бір кениялық легионер Дэйзи Джепкемей 10-орын алып, жарысты мерзімінен бұрын ақтады. Бірақ ол әлі 10 000 метрлік қашықтыққа жүгіреді. Бәлкім, Дэйзи сол сайыста тәуір нәтиже көрсетер. Сондай-ақ 200 метрге жүгіруде Ольга Сафронованың да үздіктер қатарынан көрінуге мүмкіндігі бар. Олимпиаданың ашылу салтанатында Асланбек Шымбергеновпен бірге ту ұстап шыққан танымал спортшы іріктеу сынында 8-орынды иемденді. Уақыты – 23,58 секунд. Енді Ольга жұбаныш бәсекесіне қатысады. Ал Елизавета Матвеева мен Надежда Дубовицкая (биіктікке секіруші), Әсем Орынбай мен Эдуард Ещенко (стенд атушы), Даниил Мұсабаев (батутта секіру), тағы басқа да спортшылар өз жанкүйерлерін жерге қаратты.
Кеше грек-рим күресі шеберлері өз бәсекелерін бастады. Алғашқы болып бозкілімге ең жеңіл салмақтағы Айдос Сұлтанғали мен аса ауыр салмақтағы Әлімхан Сыздықов шықты. Айдос Қырғызстанның мақтанышы Жоламан Шаршенбековпен айқасса, Әлімхан Румынияның беткеұстары Алин Чурариумен күш сынасты. Бүгін «классиктердің» жарысы жалғасады. Алдағы күндері біз әйелдер күресі мен еркін күрес шеберлерінің тартысын тамашалаймыз.
P.S. Париж Олимпиадасының жалпы командалық есебінде АҚШ құрамасы алға шықты. Америкалықтардың қоржынында 19 алтын, 26 күміс және 26 қола медаль бар. Оларды Қытай өкшелеп келеді. Аталған елдің өкілдері 19 алтын, 15 күміс және 11 қоланы олжалады. Үздік үштікті Франция түйіндеп тұр. Жарыс қожайындары 12 алтын, 14 күміс және 18 қоланы еншіледі. Сондай-ақ ТОП-10 команданың қатарында Аустралия (12+11+8), Ұлыбритания (10+12+15), Оңтүстік Корея (10+7+7), Жапония (9+5+10), Италия (7+10+5), Нидерланд (6+5+4), Германия (5+5+2) құрамалары бар. Бұл тізімде Қазақстан 29-орында тұр. Отандастарымыз әзірге 1 алтын, 1 күміс, 2 қоланы қанағат тұтып отыр.
