Ел ұстаздары бұл кісіні педагогика саласының шебері және әйгілі Қыздар педагогика институтын ұзақ жыл басқарған ректор, танымал академик ретінде жақсы біледі.
Күләш Құнантайқызы еңбектегі жолын Алматы облысындағы ауыл мектебінен, ал ғылымдағы соқпағын Абай атындағы Қазақ педагогика институтының (ҚазПИ) профессоры Р.Г.Лембергтің аспиранты деңгейінен бастап, қиын жылдары комсомолдың мектеп бөлімін басқарып, жоғары және орта білім министрінің орынбасары, шет тілдер институтының проректоры, ҚызПИ ректоры қызметтері сатысынан өтті. Ол қай жұмыста болса да қанына сіңген адалдықтан айныған емес. Турашылдық қасиет оның өмірлік кредосына айналды. Өзіне де, өзгеге де қатаң талап қоя білді.
1968 жылы 6 тамызда 37 жастағы Күләш Құнантайқызы Қазақ мемлекеттік қыздар педагогика институтына ректор болып тағайындалды. Бұл – ел басшылығының үлкен сенімі еді. Білім қайраткері осы оқу орнын 16 жыл басқарып, аталған институттың өркендеуіне өлшеусіз үлес қосты. Ол ректор болған тұста 9 нысанның (4 қабатты оқу корпусы, 3 жатақхана, оқытушылар тұрғын үйі, жаңа типті кітапхана, асхана ғимараттары, Қаскелеңдегі агробиоучаске, Қапшағайдағы демалыс үйі) бой көтеруіне ұйытқы болды. Мәдени салаға келсек, атақты «Айгүл» ансамблін құрып, кітапхана және музыкалық білім саласында тың жобаларды жүзеге асырды.
Ғалымның ұрпақ жадында қалар игі істері жеткілікті. Әсіресе, басшы ретінде де, ұстаз ретінде де қазақ қыздарының тәрбиесіне айрықша көңіл бөліп, болашақ аналардың жүрегіне білім мен мейірім нәрін құя білді. Ғалым ретіндегі ғылыми тақырыбы да әйелдер тақырыбымен астасып жатыр. Күләш Құнантайқызының 1981 жылы қорғаған докторлық диссертациясының «Қазақстандағы әйелдерге білім беру ісі: қалыптасуы мен дамуы» деп аталуы да кездейсоқ емес. Ол қашанда қазақ әйелінің еңбегін, адалдығын, рухын асқақтатып жүрді. Ол осылайша ғылыми ізденіс жолында ақыл-парасатын жұмсады, тер төгіп тынымсыз еңбек етті. Адал еңбегінің нәтижесін көрді, шәкірттер тәрбиеледі, өзінің ғылыми мектебін қалыптастырды.
«Тұңғыш» сөзі Күләш Құнантайқызының есімімен байланыста айтылады. Ол қазақ қыздарының ішінде бірінші болып педагогика саласында ғылым докторы атанды. Кезіндегі КСРО Педагогика ғылымы академиясына қазақ қыздарының арасынан бірінші корреспондент-мүшесі болып сайланды. Қазақ қыздарының ішінен тұңғыш Ресей Білім академиясының мүшесі, Грузия Білім академиясының мүшесі болған да – Күләш Құнантайқызы. Еліміз тәуелсіздік алған соң Жоғары аттестаттау комиссиясының педагогика, психология ғылымы сараптама бөлімшесінің алғашқы төрағасы да – осы ғалым.
Халқымыз ғалымның хаты да, аты да елмен бірге жасайтынына куәлік береді. Біз осы даналықты Қазақстан педагогика саласының теориясы мен практикасына, ірі жобаларына үлес қосқан профессор, академик марқұм Күләш Құнантаеваға қатысты да айтамыз. Ұстаздардың ұстазының өмірі әлі талай ұрпаққа өнеге болары сөзсіз.
Перизат Сейітқазы,
педагогика ғылымдарының докторы, профессор
