Коллажды жасаған – Қонысбай ШЕЖІМБАЙ, «EQ»
«Атырау» әлеуметтік-кәсіпкерлік корпорациясы» АҚ төрағасы Данияр Тахановтың мәліметіне сүйенсек, бес жыл бұрынғы статистикамен салыстырғанда тұрақтандыру қорындағы әлеуметтік маңызы бар азық-түлік тауарларының түрі 5-тен 18-ге, сату нүктелері 4-тен 54-ке жетіпті. Ал тұтынушыларға сатылған көкөніс өнімінің көлемі 3 жылда 1 461-ден 5 136 тоннаға дейін артқан. Қазір тұрғындар күнделікті тұтынатын осындай тауарлардың бағасын тұрақтандыру үшін айналым қаражатын толықтыру қолға алынып отыр. Осы мақсатты іске асыру үшін жергілікті 2 сауда желісімен, 8 тауар өндірушімен келісімшарт жасалған.
Облыс әкімінің орынбасары Жасұлан Бисембиевтің пікірінше, әлеуметтік маңызы бар азық-түлік бағасын тұрақтандыру бағытындағы жұмысты жандандыру қажеттігі туындап отыр. Өйткені ең басты мәселе – күнделікті тұтынатын азық-түлік тауарларының бағасын шекті деңгейден асырмау. Сол себепті бағаға байыпты көзқарас қажет.
«Осы орайда әкімдік жанынан әсер етуші факторларды жою маңызды. Әлеуметтік маңызы бар азық-түлік бағасын негізсіз өсіруге жол беруге болмайды. Облыс тұрғындары үй маңындағы дүкендер мен шағын маркеттерде баға көтерілгенін байқаса, шағымды кімге, қайда жолдау қажеттігін білуге тиіс. Бағаны негізсіз өсіргендерге қарсы жұмыс тоқтамайды», деді Жасұлан Бисембиев.
Бірақ тұтынушыға азық-түлік ұсынатын сауда желілері бағаны тұрақты деңгейде ұстауды «ұмытып» кетеді. Тіпті табиғи сипаттағы төтенше жағдай кезінде бағаны шекті деңгейден асырып жібергендер бар. Атырау облыстық сауда және тұтынушылар құқығын қорғау департаменті басшысының орынбасары Еркебұлан Тағашевтың мәліметінше, биыл 6 айда «Сауда қызметін реттеу туралы» заң талаптарын бұзған 51 кәсіпкерлік субъектіге жоспардан тыс тексеру жүргізілген. Тексеру қорытындысымен 46 кәсіпкерлік субъектіге 16 ескерту беріліп, 30 әкімшілік айыппұл салынған. Айыппұлдың жалпы сомасы 2 млн 817 мың 691 теңге болған.
«Мамыр айында әкімдік өңірде әлеуметтік маңызы бар азық-түлік тауарларына рұқсат етілген шекті бөлшек сауда бағаларының мөлшерін бекітті. Осыған орай мониторингтік топ апта сайын әлеуметтік маңызы бар азық-түлік тауарларының бағасын қадағалады. Өңірдегі сауда нысандарының иелеріне бағаны тұрақтандыру жөнінде кеңес берілді. Соған қарамастан тұтынушылар арызына сәйкес Атырау қаласындағы «Анвар», «Марко», «Ярмарка», «Маша Фрут», Құлсары қаласындағы «Идеал» супермаркетіне және «Ілиясова Г.Б.» жеке кәсіпкерлігіне «Әкімшілік құқық бұзушылық туралы» кодекстің 202-бабына сәйкес шара қолданылды. Өйткені олар төтенше жағдай кезінде белгіленген тауарларды шекті бағадан асырып сатқан», деп хабарлады Еркебұлан Тағашев.
Сондай-ақ департаментке жыл басынан бері тұтынушылардан 424 арыз түскен. Оның ішінде 230 арыз қанағаттандырылды. Демек бұдан тұтынушылар талабы орынды болғаны байқалады. Ал 82 арыз иесіне сотқа шағымдану жөнінде жазбаша түсінік берілген. Сонымен бірге 84 арыз тиісті мемлекеттік органдарға қайта жолданып отыр. Кейін 8 тұтынушы арызын кері қайтарып алған. Қазір 20 арыз қаралып жатыр.
«Тұтынушылар арызын қарау кезінде жоспардан тыс 12 тексеру жүргізілді. Соның нәтижесімен кәсіпкерлік субъектілеріне 10 ескерту берілді. Департамент тарапынан берілген нұсқауды орындамағаны үшін Атырау қалалық мамандандырылған сотының қаулысымен «Мечта Маркет» ЖШС-ға 1 млн 300 мың теңге көлемінде айыппұл салынды», деп мәлімдеді Е.Тағашев.
Атырау облысы
