1995 жылы Семей қаласында дүние есігін ашқан сәбиге Құнанбай әулетінің үлкендері қандай ат қоямыз деп бас қатырған жоқ. Себебі нәресте өмірге келерден бір апта бұрын бақиға көшкен Екінші дүниежүзілік соғысқа қатысқан атасы «Абай» деген ат қойыңдар деп өсиет етіпті. Сол жылы дүркіреп өткен хакім Абай Құнанбайұлының 150 жылдық мерейтойы да әсер еткен болар деп топшылайды жақындары. Бүгінгі күні Абай облысы полиция департаменті Есірткі қылмысына қарсы іс-қимыл басқармасының жедел уәкілі болып қызмет атқаратын Абай Шалқарұлы атасы қойған осы бір аяулы атты абыроймен алып жүр.
Мектеп жасында жүргенде Абай есімінің бар ауыртпалығын сезініп, қиналғанын бүгінде жымиып қана есіне алатын Абай Құнанбаев: «Сабақты жақсы оқуға тырыстым. Үйдегі ата-анам да, мұғалімдер де барынша білікті, білімді болуға баулыды. Сабақ оқымай не қандай да бір тентектік іс қылсам, Абай есімінің мәні мен мағынасын терең түсіндіретін. Содан кейін бе, алғыр болып алға ұмтылуға, замандастардың алды болуға құлшындым», дейді.
Орта мектепті тәмамдаған соң Алматыға аттанды. Жас Абай ІІМ Алматы академиясының курсанты атанды. Ішкі істер саласының білгір мамандарын даярлайтын оқу орнын ойдағыдай бітіріп, лейтенант шенін алып шықты.
Абай Құнанбаев ақын Абай шығармашылығын бала кезден білгенінің артық болмағанын айтады. Еңбек жолын Өскемен қаласы Ішкі істер басқармасының криминалдық полиция бөлімінің жедел уәкілі болып бастады. Осы бөлімде қызмет атқара жүріп, қалта және пәтер ұрлықтарын ашумен айналысатын арнайы топ өкілдерімен тізе қосып қызмет атқарды. 2020 жылы Шығыс Қазақстан облысы полиция департаменті криминалдық полиция басқармасының жеке тұлғаға қарсы қылмыстарды ашу бөлімінің жедел уәкілі лауазымына ауысты. Екі жыл бойы қызмет баспалдағын ойдағыдай атқарып, Абай облысы құрылғаннан кейін облыс орталығына көшіп келді. 2023 жылдан бері Абай облысы Полиция департаментінің есірткі қылмысына қарсы іс-қимыл басқармасының жедел уәкілі болып қызмет етеді.
Ұлы ақын есімін иеленіп жүрудің ауыртпашылығы мен жеңіл тұстары туралы сұрағымызға полиция капитаны: «Дана болсын, дана болмаса да, сол даналықты түсінер ұл болсын деп ат қойғаннан кейін Абай есімін алып жүру ауыр не қиын деп айтуға болмас. Бастысы, осындай есімің болғаннан кейін әртүрлі жағымсыз қылықтан бойыңды аулақ ұстайсың. Жауапкершілікті сезінесің, бұл алдымен Абай атын жамандықтан арашалау болса, екіншіден, ата-ана үмітіне селкеу түсірмеу», дейді Абай Құнанбаев ағынан жарылып.
Абай облысы
