Ынтымақ ырғағы
Табалдырығымыздан аттаған жыл ел бірлігінің, татулықтың жылы болып тұр. Бұл іске биыл Алматы шаһарының белсенді жастары да араласатын болады. Және осы бастамаға Қазақстандағы талай ұлттың қызына жоғары білім берген Қазақ мемлекеттік қыздар педагогикалық университеті де қосылды. Осынау шаралар Қазақстан халқы Ассамблеясының 20 жылдығына арналады.
70 жыл ішінде Алматыдағы қыздар университетінде білім алған
Сонымен, қыздар университетінде «Менің Қазақстаным!» атауымен өткен ауқымды басқосуда әртүрлі ЖОО-да білім алып жатқан тегі – бөлек, теңдігі – бір, түрлі этнос өкілдері қазақстандық патриотизм моделін нығайту, ұлтаралық татулық пен достық қатынас, этносаралық толеранттылық пен қоғамдық келісім тақырыбында дидарласты.
Жастардың ауызбіршілігіне бастаған жиынды Қыздар педуниверситетінің ректоры Динар Нөкетаева ашып, елдіктің жолы, Қазақстан халқы Ассамблеясының тарихы, татулыққа қосқан үлесі жайлы студенттерге жан-жақты әңгімелей келе:
– ...Мемлекеттің тыныс-тіршілігі, қайнаған өмірінің кішкентай көрінісі біздің киелі шаңырағымызда өтіп жатыр. Арман қуып әсем Алматыға аяқ басқан қыздар арулар ордасына табан тіреп, сапалы білім алып, білікті маман болып шығып жатқандарына, міне, 70 жылдан асты. Қазақтың ғана емес, қырғыз, өзбек ағайындардан бастап, ұйғыр, тәжік, күрд, орыс, украин, корей секілді 480-нен аса өзге ұлт өкілдері білім алып жатқан тілегі бір қыздарына Қыздар университеті үлкен тірекке айналды, – деді.
Одан әрі сөз алған «Мемлекеттік тілге құрмет» бірлестігінің төрайымы, Қазақстан халқы Ассамблеясының мүшесі Асылы Осман: «Бүгін келешегіміздің кепілі, Алматының бетке ұстар қаймағы – жастар бас қосып отырған маңызды күн. Бүгінгі таңда Елбасының қойып отырған негізгі мақсаты да ел бірлігі. Ол бірліктің тұтқасы да, ұйытқысы да, келешегі де жастар деп үміт артып отыр, сол сенімді ақтайтындай елдің мықты қайраткері, елін сүйген, жерін сүйген азаматтары болыңдар. Ел бірлігін ақ қардай асқақтата біліңдер, елдің ынтымағына, татулығына ұйытқы болыңдар! Қыздар университетінде оқитын көптеген өзге ұлт өкілдерінен тұратын сіңлілеріме апалық ретінде айтар назым «Тілді білген адам ғана сол ұлтты құрметтейді, салтына, дәстүріне бойлайды», – деді.
Шара барысында Қыздар университетінде білім алып жатқан өзге ұлт өкілдері де татулық пен ынтымақ туралы өз ой-пікірлерін білдіріп, жүрекжарды тілектерін жеткізді. Атап өте кетейік, арулар ордасында қазіргі таңда 480-нен аса өзге ұлт өкілі оқиды.
Жиын соңында белсенді жастар Қазақстан халқы Ассамблеясының 20 жылдығына орай арнайы қарар қабылдады. Онда: ««Мәңгілік Ел» болуға бет алған Қазақ елінің «алтын» жастары болашаққа үлкен сенім білдіре отырып, ұлтының өсіп-өркендеуіне ықпал ететін, өркениетті ел азаматы болуға дайындалуда. Сондықтан, біз алдымызға нақты міндеттер қоя отырып, мықты да бәсекеге қабілетті «Мәңгі Қазақстанды» құру үшін аянбай тер төгеміз, барлық жастық күш-жігерімізді арнаймыз!» делінген.
Айнаш ЕСАЛИ,
«Егемен Қазақстан».
АЛМАТЫ.
Жарасымдылық
Аветик АМИРХАНЯН,
«Айдана» ЖШС директоры, «Мирзоян» армян этномәдени қоғамдық бірлестігінің төрағасы, қалалық мәслихаттың депутаты.
Қазақ елінің егеменді ел атанғанына 23 жылдан асты. Осы уақыт ішінде Елбасы Нұрсұлтан Назарбаевтың бастамасымен елімізде көптеген инновациялық бағдарламалар жүзеге асырылды. Нәтижесінде Қазақстан экономикасы дамыған өркенді елге айналды.
Бүгінде Қазақ елін бүкіл әлем таниды, оның басшысының көрегендігін барша жұрт мойындайды. Өзім жеке кәсіппен айналысатын болғандықтан, кәсіпкерлерге жасалып жатқан жеңілдіктерді жиі пайдаланамын. Басқа елдерде кәсіпкерлерге мұндай қолдау жасалмайды. Өзге мемлекеттің кәсіпкерлері бізге қызыға қарайды.
Елбасының сарабдал саясатының арқасында біздің елімізде бар халықтың өкілі бірдей жағдайда, ынтымақтаса өмір сүруде. Түрлі ұлт өкілдерінің тату-тәтті өмір сүруінің арқасында Қазақстанда саяси жағдай тұрақты. Мен осындай дархан да бауырмал, қонақжай елде тұратынымды мақтан тұтамын. Менің және балаларымның Отанына айналған Қазақ елінің егемендігі мәңгілік болсын!
Батыс Қазақстан облысы.
