Батыс Қазақстанда аудан әкімі тағайындалды

ОРАЛ. 12 маусым. Батыс Қазақстан облысының әкімі Нұрлан Ноғаевтың өкімімен Әділ Тауфиқұлы Жоламанов Ақжайық ауданының әкімі болып тағайындалды. Бұл туралы egemen.kz тілшісі хабарлады. Аудандық мәслихат депутаттары облыс әкімінің Әділ Жоламановты Ақжайық ауданының басшысы етіп тағайындау туралы ұсынысын бірауыздан мақұлдады. Ал бүгінге дейін аталған ауданның әкімі болып келген Нариман Төреғалиев басқа жұмысқа ауысуына байланысты, қызметінен босатылды. Ол бұл қызметке 2012 жылғы наурыз айында келгенін айта кетейік. Облыс басшысы жемісті қызметі үшін оған алғысын білдіріп, жаңа әкімді аудан активіне таныстырды. Сондай-ақ, өңір басшысы Әділ Жоламановқа әкімдік міндетін абыроймен атқаруына тілектестігін білдірді. Әділ Жоламанов Батыс Қазақстан облысы, Сырым ауданында 1968 жылы туған. Еңбек жолын туған жерінен бастаған ол Сырым ауданы әкімінің орынбасарлығына дейін көтерілді. 2014 жылғы мамырдан бері Батыс Қазақстан облысы ауыл шаруашылығы басқармасы басшысының орынбасары қызметін атқарып келді. Темір Құсайын. Дерек: egemen.kz. Сурет: ruinformer.com.