Таразда волейболдан әлемдік лиганың ойындары өтуде

ТАРАЗ. 12 маусым. Бүгін Таразда волейболдан әлемдік лиганың ойындары басталды. Аталған сайысқа Қазақстан құрмасы да қатысуда. Бұл туралы egemen.kz тілшісі хабарлады. Ерлер арасында өтетін дүбірлі жарыс жыл сайын ұйымдастырылып келеді. «Н» тобында ойнайтын Қазақстан Венесуэла, Египет және Испания құрамаларымен күш сынасады. «Тараз Арена» спорт сарайында өтетін жарыс 14 маусымға дейін жалғасады. Жарыс алдында командалардың бас жаттықтырушылары мен капитандары баспасөз мәслихатын өткізді. Онда Қазақстан құрамасының бас жаттықтырушысы Андрей Патраков кейбір мықты ойыншыларымыздың додаға қатыса алмайтынын айтты. Олардың орнын жас ойыншылар басқан. Ал құраманың капитаны Александр Стольников жеңіске жету үшін бар күш-жігерлерін салатынын жеткізді. Сондай-ақ, Венесуэла және Испания командаларының бас жаттықтырушылары Наччи Винченцо мен Фернандо Бенитес Муньостер де бұл бәсекеде аянып қалмайтындарын айтты. Қазақстан алғашқы ойынын бүгін сағат 18:30-да Венесуэла командсына қарсы өткізеді. Ертең Египетпен күш сынасса, соңғы жарыс күнінде Испанияға қарсы тер төгеді. Бұл екі кездесу де жергілікті уақыт бойынш сағат 18:30 басталатынын айта кетейік. Оралхан Дәуіт. Дерек, сурет: egemen.kz.