Жалпы, «Самұрық-Қазына» ұлттық әл-ауқат қоры қоғамдағы инклюзия мәселелерін басты назарда ұстайды. Осы бағытта қор корпоративтік әлеуметтік жауапкершілік аясында халықтың сұранысына сай шалғайдағы өңірлерде әлеуметтік жобаларды іске асырып келеді.
Қор басшысы Құлсары қаласындағы ерекше балаларға арналған жаңа оңалту орталығын іске қосты. Салтанатты ашылу рәсімінде Атырау облысы әкімінің орынбасары Марат Мурзиев қатысты.
– Бұл әлеуметтік нысан 150 орынға арналған. Орталықта 3 жастан 6 жасқа дейінгі ерекше балалар білім алады. Қор корпоративтік әлеуметтік жауапкершілік шеңберінде мүмкіндігі шектеулі адамдардың қоғамдық өмірге толыққанды араласуы үшін барлық жағдайды жасайды. Біз бұл бағыттағы жұмыстарды жалғастыра береміз, – деп атап өтті қор басшысы.
Аталған орталық «Самұрық-Қазына» АҚ компаниялары тобының атынан «Ембімұнайгаз» АҚ қаржылай қолдауымен салынды.
Жалпы, елімізде «Самұрық-Қазына» қорының қолдауымен ашылған 42 оңалту орталығы жұмыс істеп тұр. Бұл орталықтарда 40 мыңнан аса бала оңалтудан өтті.
Ерекше бала тәрбиелеп отырған шалғайдағы ата-аналар бұрын қажетті көмек алу үшін облыс орталықтарын аралайтын еді. Ендігі заманауи орталықтардың өз өңірлерінде ашылғанына шексіз қуанышты. Себебі мұнда ерекше балалармен кәсіби мамандар – логопед, дефектолог, психолог, әлеуметтік педагог, олигофренопедагог, емдік денешықтыру маманы мен медбике жұмыс істейді.
Сондай-ақ Нұрлан Жақыпов Құлсары қаласында салынатын спорт кешенінің құрылыс жұмыстарын бастауға рұқсат берді.
– Биылғы көктем елімізге аса ауыр тиді. «Самұрық-Қазына» су тасқынынан зардап шеккен өңірлерге 22 млрд теңгеден аса қаражат бөлді. Бұған қоса біздің шетелдік әріптестеріміз 2,5 млрд теңгеге көмек көрсетті. Жиналған қаражатқа үш өңірде спорт кешендерін салып жатырмыз. Бұл өңірлердің бірі – Құлсары. Құлсарыда біз биыл спорт кешенінің құрылыстарын бастаймыз, – деді Нұрлан Жақыпов.
Өткен жылы қор 7,2 млрд теңгеге 46 әлеуметтік жобаны іске асырды. Жарты миллионнан аса азаматқа әлеуметтік көмек көрсетілді.
Сонымен қатар Атырау облысының Қызылқоға ауданына қарасты Миялы ауылында да ерекше жандарға арналған оңалту орталығы ашылды.
Салтанатты ашылу рәсіміне «Samruk-Kazyna Trust» бас директоры Альфия Адиева, Қызылқоға ауданының әкімі Қанат Әзмұханов, «Ембімұнайгаз» АҚ бас директорының геология және кен орындарын игеру жөніндегі орынбасары Асқар Мұнара қатысты.
«Samruk-Kazyna Trust» бас директоры Альфия Адиева резиденттердің орталыққа қатынауы үшін инватаксилерді табыстады.
Бұдан былай 100-ден аса аудан тұрғыны кешенді орталықтың көмегіне жүгіне алады. Орталық заманауи оңалту құралдарының 12 түрімен жабдықталған. Инсульт, инфаркт, түрлі жарақат алған адамдарды қабылдай алады. Сондай-ақ нақты оңалту мақсаттарына қол жеткізуге бағытталған жеке оңалту бағдарламалары жүргізіледі.
Мұндай игі іс-шаралар өңірлердің дамуына үлкен серпін беретіні сөзсіз. Екіншіден, жастар арасында саламатты өмір салтын ұстануға жаңа мүмкіндіктер туғызады.
«Samruk-Kazyna Trust» КҚ баспасөз орталығы
