Қор басшысы Нұрлан Жақыпов Батыс Қазақстан облысына іссапары аясында аталған облыс әкімі Нариман Төреғалиевпен бірге Оралдағы «OzgeEpic Oral» креативті хабының жөндеу жұмыстарымен және құрылыс қарқынымен танысты. Жоба Қордың бірыңғай қайырымдылық операторы «Samruk-Kazyna Trust» қорының қаржыландыруымен жүзеге асып жатыр.
– Мемлекет басшысы аймақтарда шығармашылық индустрия орталықтарын ашуды тапсырған еді. Бұл бастама өңірдегі талантты жастардың әлеуетін ашуға мүмкіндік береді. Сонымен қатар креативті хабтар аймақ экономикасының дамуына серпін әкеледі. Былтыр Ақтөбе облысындағы кітапхана ғимаратын ғылым мен креатив орталығына айналдырған едік. Биыл Орал қаласында креатив хабын салу жұмыстарын бастап кеттік. Дәл осындай орталық Солтүстік Қазақстан облысында да ашылады, – деді қор басшысы Н.Жақыпов.
Орталық жастардың қосымша білім алып, шығармашылық қабілетін дамытуына мүмкіндіктер туғызбақ. Хабта заманауи қазақ өнері мен инновациялық көркемдік шешімдерді дамыту, сондай-ақ Қазақстан мен халықаралық қауымдастықтар шеңберінде арт-жобалар әзірлеу жоспарланып отыр. Резиденттер қатарына 14 пен 35 жас аралығындағы шығармашылық индустрияда жұмыс істейтін жастар, соның ішінде NEET санатындағы жастар мен ерекше қажеттіліктері бар жандар мен студенттер кіреді.
Жаңа креативті хабта жастар спектакльдер мен түрлі шеберлік сабақтарына, анимация мен дубляж жасауға еркін қатыса алады. Сонымен қатар сұранысқа ие бағыттар бойынша 200 адам жаңа мамандықтарды игереді.
Жаңа шығармашылық хабтың ашылуы келесі жылдың соңына жоспарланған.
«Samruk-Kazyna Trust» КҚ баспасөз орталығы
