«Биылғы қатысушылар қатарын көріп, көңілім толып тұр. Бұрын мұншалық көп болмайтын. Ұлттық салт-дәстүрді насихаттауда бұл байқаудың орны бөлек», дейді облыстық Ардагерлер кеңесінің төрағасы Сағындық Қожамсейітов.
Әрине, әр отбасының өзіндік ерекшелігі бар. Жарысқанда жүйріктен жүйрік озатынын бабаларымыз бұрыннан-ақ айтып кеткен.
Байқаудың облыстық деңгейінде «Үлгілі отбасы» аталымына Жезқазған қаласының тұрғыны Хамзахан Айтмұхановтың отбасы лайық болды. Аталған отбасының шаңырақ көтергендеріне өткен жылы жарты ғасыр толған екен.
«Берекелі шаңырақ» аталымын иеленген Ерлан Сыздықовтың отбасы Сәтбаев қаласында тұрады. Бұл шаңырақтың балалары өнерге, спортқа жақын. Олардың кейбірі республикалық жарыстардың жеңімпазы атанып, облыстың атағын аспандатып жүр.
Байқау барысында «Белсенді отбасы» аталымын Қаражал қаласынан қатысқан Нәукеновтер жеңіп алса, «Өнерлі отбасы» аталымына жаңаарқалық Айтжановтар отбасы лайық деп танылды.
Ұлытау ауданынан келген Қыдырпатшаевтар әулеті «Мерейлі отбасы» ұлттық конкурсының лауреаты» атағына ие болып, Астана қаласында өтетін республикалық марапаттауға қатысатын болды.
Ұлытау облысы
