Қас қарайғандағы қарақшылық

Бұл кезде үйде қожа­йын­­нан басқа 12 жастағы жие­ні де бол­ған екен. Со­ған қарағанда қарақ­шы­лар үй­де қарсылық көрсететін еш­кімнің болмайтынын алдын ала білген сыңайлы. Қылмыскерлер екеуін күш көрсетіп, қорқы­тып-үркітіп, ұрып-соққан. Ке­йін байлап тастап, аузы-бастарын скотчпен жапсырып, үйдің астан-кестенін шығарып, ақша мен бағалы заттарды іздейді. Олар­дың қолына алтын-күміс­тен жасалған бірнеше асыл бұ­йым, ақша түседі. Қарақшылар қол­дарына түскен екі жаңа ұялы телефонды да қалталарына салып алады. Алдын ала есептеуге қарағанда ұрланған дүниелер мен ақшаны қосқанда күдіктілер 640 мың теңгенің затын қолды қылып, тайып тұрған.

Полицияның мәліметіне қа­ра­ғанда, 41 жаста­ғы үй иесі емес 12 жастағы оның жиені қайсарлық көрсеткен. Ол қарақшылар кеткен бойда тісімен скотчты қиып, қолы мен аяғын босатады. Сөй­тіп, нағашысының да қол-аяғын бұғаудан босатады. Жеткіншек мұ­нымен де тынбай есі шығып кеткен нағашысын үйге қалдырып, ­өзі жақын жерде тұратын учаске­лік инспектор­дың үйіне барып, бол­ған жайтты жеткізеді. Аудан­дық полиция бөліміне дабыл түнгі 12-лер шамасында түскен. Бұл қылмыс болғаннан үш сағат­тай уақыт өткен кез. Қыл­мыстың ізін суытпай көтерілген полиция барлық келген-кеткен көліктер­ді тізімге алып, күдікті деген, есепте жүрген адамдардың бәрі­нің қайда болғанын анықтай бас­та­ған. Қылмысты дәлелдейтін ай­ғақ заттардың тізімі де жол­да­ғы полиция патрульдеріне бе­рі­ле­ді. Ақыры полиция күдік­ті­лерді анықтап, олардың соңы­на түс­кен. Облыстық және Тайын­ша аудандық криминалдық полиция басқармасының жедел қызметкерлері қарақшылар мін­ген көлікті Астана қаласының аумағында сол түні тоқтатқан.

«Жедел жүргізілген жедел тек­­се­ріс нәтижесінде қа­рақ­­­шы­лыққа күдіктілер – Сол­түс­тік Қа­зақстан мен Ақмола об­лыс­­­тары­ның 30 бен 38 жас ара­лы­ғын­дағы тұрғындары ұстал­ды. Қазір олардың үшеуі қа­мау­да отыр. Ал біреуі әзірге бос­тан­дықта. Олардан айғақ заттар тәр­кі­леніп, бұл оқиғаға қатысты қы­лмыстық іс қозғалды», дейді об­лыс­тық ПД криминалдық по­ли­ция басқармасының басшы­сы, полковник Иван Терзиди. Қыл­мыстары дәлелденсе, қарақ­шы­лар Қылмыстық кодекстің 192-бабы­мен 7-ден 12 жылға де­йін бас бос­тандығынан айыры­луы мүмкін.

Солтүстік Қазақстан облысы,

Тайынша ауданы