![Құмар ойындарға қарсы құжат](/media/2024/08/30/7-11-1280x960.webp)
Фото: kz.kursiv.media
Кездесуге Қаржы нарығын реттеу және дамыту агенттігінің төрағасы Мадина Әбілқасымова, Қаржы министрі Мәди Такиев, Туризм және спорт министрі Ермек Маржықпаев, Ұлттық банк төрағасының орынбасары Ақылжан Баймағамбетов, Мәдениет және ақпарат вице-министрі Қанат Ысқақов қатысты.
Жиынды ашқан агенттік төрағасы Дмитрий Малахов қолданыстағы заңнамада құмар ойындар мен лотерея қызметін реттеуге бағытталған бірқатар шараның қарастырылғанын атап өтті. Алайда онлайн ойынқұмарлық қоғамда әлі де өзектілігін жойған жоқ.
Өткен жылы агенттік Мәдениет және ақпарат министрлігімен бірлесіп, TikTok-та жаппай карта ойындарын ұйымдастырудың алдын алған еді. Нәтижесінде, 300-ден аса ұйымдастырушы аккаунты анықталып, құқыққа қайшы контенттің эфирін жедел түрде бұғаттауға мүмкіндік беретін жасанды интеллект енгізілген болатын. Қазіргі уақытта Instagram-дағы заңсыз лотереяларды ұйымдастырушыларға қарсы жұмыс жүргізіліп келеді.
Сала басшысы агенттік азаматтарды заңсыз лотереяларға тартатын адамдарды анықтауда Мәдениет және спорт министрлігіне көмек көрсетуге, сондай-ақ төленбеген салықтарды қосымша есептеу үшін Мемлекеттік кірістер комитетіне ақпарат ұсынуға дайын екенін мәлімдеді.
Бүгінде онлайн-казиноларға қарсы күрес бойынша ауқымды әрі жүйелі жұмыс жүргізіліп келеді. Жыл басынан бері 6 мыңнан аса заңсыз сайт бұғатталып, көшірмелері тәулік ішінде жойылды. Мамандардың айтуынша, заңсыз онлайн-құмар ойындарға қарсы күресте олардың қаржылық операцияларын тоқтату маңызды. «Шетелдік ұйымдастырушылар қазақстандық ойыншылардан тікелей ақша қабылдай алмайды, сондықтан олар жергілікті төлем ұйымдары мен банктерді пайдаланады. Алайда құмар ойындар туралы жаңа заң күшіне енгеннен кейін интернет-казиноға жасалатын транзакциялар шектеледі. Ал банктер мен төлем ұйымдары көмек көрсеткені үшін жауапкершілікке тартылады», дейді агенттік өкілдері.
Бұл мәселе бойынша ҚМА, Туризм және спорт министрлігі, Ұлттық банк бірлесіп жұмыс істеп, заңсыз ақша аударымдарын анықтап, бұғаттауды жүзеге асырады.
Жиын соңында қатысушылар құмар ойындарға патологиялық тәуелділіктен жас ұрпақты қорғауға бағытталған шаралар мен іс-қимыл алгоритмін қамтитын ынтымақтастық туралы меморандумға қол қойды.