Ақпараттар ағыны

*Жақын уақытта теңге бағамында күрт өзгеріс бол­майды. Ұлттық банктің төра­ғасы Қайрат Келімбетов атап көрсеткендей, айырбас бағамы 1 АҚШ долларына шаққанда 170-188 теңге деңгейінде сақ­та­латын көрінеді. *Елімізде Ұлы Отан со­ғысы туралы ақпараттық портал құрылады. Еуразиялық медиафорумның бас директоры Руслан Жемковтың айтуынша, онда қазақстандық ардагерлердіңмәліметтер базасы орналастырылады. Дәлірегі, жоба арқылы жеңіске көмегі тигендер, соғысқа қатысқандар және даламыздан шыққан батырлар туралы ақпарат ұсынылады. *Былтыр «Тұлпар-Таль­го» пойыздары қызметін 1 млн.-нан астам жолаушы пайдаланды. «Жолаушылар тасымалы» АҚ баспасөз қыз­меті хабарлағандай, аталған тасымал көліктері соңғы 3 жылдың ішінде ашылған жаңа 8 бағыт бойынша қатынайды. Айта кетейік, бұл пойыздардың вагондары заман талабына сай жабдықталған. *«Шұбаркөл көмір» АҚ өз жұмыскерлеріне жа­ңа жай салып берді. Қара­ған­ды облысындағы «Орта­лық» вахталық кентінде ор­на­­лас­қан 60 орындық демалыс үйіне Еуразиялық Топ (ERG) құрамына кіре­тін ком­панияға қарас­ты №1 автоколоннаның жұмыс­шылары жайғасты. *Оңтүстік Қазақстанда 124 мыңға жуық ағаш кө­шет­тері егілді. Облыстық табиғи ресурстар және табиғат пайдалануды реттеу басқармасының басшысы Мұхит Отаршиевтің сөзіне қарағанда, орман ағаш­тарын молайтудың 2012-2014 жылдарға арналған іс-шаралар жоспарына сәйкес, былтыр өңірде 19 657 га. жерге сексеуіл ұрығы себілсе, 860 га. алқапқа оның көшеті отырғызылған. *Ақмола облысы Щу­чье қалалық ішкі істер бас­қар­масының жедел басқару орталығы ашылды. ЖБО-ның бақылау жүйесі 20 еселік оптикалық үлкейту қасиеті бар, ауа райының кез келген жағ­дайында басқарылатын 20 бей­небақылау камерасынан тұ­рады. Оның ашылуына ай­мақ басшысы Сергей Кулагин қатысты. *Батыс Қазақстанда газдандыру жұмыстарына 2,6 млрд. теңгеден астам қаржы бөлініп отыр. Облыстық энергетика және тұрғын үй-коммуналдық шаруашылығы басқармасының бөлім басшысы Нұржан Боранқұлов мәлім еткендей, көрсетілген қар­жының 2,3 млрд.-тан астам тең­гесі республикалық, ал 316 млн. теңгесі жергілікті бюд­­­жет­­тен қаралған. Осының есебі­­нен 15,5 мың тұрғыны бар 25 ел­ді мекенге газ тартылады. *Солтүстік Қазақстанда ШОБ саласында 112 мың­нан астам адам еңбек ете­ді. Облыстық статистика депар­таментінің баспасөз қызметі өткен жылдың қаңтар-қыркүйек айлары аралығында бұл салада 209,7 млрд. теңгенің өнімдері өндірілгенін мәлімдеді. Хабарлар Үкімет, облыстық әкімдіктер сайттары мен «ҚазАқпарат» деректері бойынша дайындалды.