Сурет: ашық дереккөзден
Биылғы Жолдаудың «Әділетті Қазақстан: заң мен тәртіп, экономикалық өсім, қоғамдық оптимизм» атты тақырыппен ұсынылуының өзі ел ертеңіне деген сенімді нығайтып, мемлекет болашағына деген оптимистік үмітке от беріп отыр.
Саяси құжатта отыз жылдан астам қолданыста болған банк жүйесін жетілдіруге арналған жаңа заң қабылдау мәселесі орынды көтерілді. Сонымен қатар еліміздің экономикалық әлеуетінің берік іргетасын қалыптастыру мақсатында жаңа Салық кодексі аясында мемлекеттік бюджеттің кіріс бөлігін арттыра түсу жолдарын да қарастыру туралы өте маңызды тапсырмалар берілді.
Президент Жолдауда барлық салада инвестициялық ахуалды және бизнес жүргізуге қажетті жағдайды жақсарту жолында үздіксіз жұмыс жүргізуді тағы да баса айтты. Оның ішінде агроөнеркәсіп кешеніне инвестиция тарту өте маңызды міндет екеніне айырықша тоқталды.
Президент: «Бір сөзбен айтсақ, Әділетті Қазақстан құрылып жатыр. Мұның бәрі, ең алдымен, халықтың қалауымен жасалуда. Сондықтан біз алған бетімізден қайтпаймыз, бағытымыздан таймаймыз», деп мемлекеттік даму саясатының нақты жолдарын айқындап берді. Сонымен қатар өткен жылы басталған «Ауыл аманаты» жобасының табысты нәтижелеріне кеңінен тоқталып, ендігі жерде осы жоба аясында тағы бір жаңа тәсілді, яғни «тауар несиесін» беру мәселесін қарастыру қажеттігін көрсете келе, «Amanat» партиясының бастамасымен Жамбыл облысы Меркі ауданында жүзеге асырылып жатқан осы оң тәжірибені басқа да аймақтарға таратуды ойластыруы керектігін Үкімет пен әкімдерге міндеттеді.
Сондай-ақ Мемлекет басшысының 2025 жылды Жұмысшы мамандықтары жылы деп жариялауы қоғам ішінде үлкен серпіліс туғызары ақиқат. Өйткені еліміздің барлық саласы қазіргі таңда орта кәсіби мамандар жетіспеушілігін сезініп отыр. Ал бұл мәселенің техникалық және кәсіби білім жүйесін табысты реформалау арқылы оң шешімін табарына күмән келтіруге болмайды. Жалпы, «Адал азамат – Адал еңбек – Адал табыс» қағидаты арқылы еңбек адамына қашанда құрмет, сый көрсетіп, биікке көтеру бүгінгі Әділетті Қазақстанның жарқын көрінісі болуға апарар жасампаз жол екені даусыз.
Бұлардан басқа да аса үлкен келелі де өзекті мәселелерді көтерген жаңа Жолдаудың түпкі мақсаты ел игілігін арттыруға, қоғам тыныштығы мен ынтымақты сақтауға негізделген.
Ендігі алда тұрған аса жауапты жұмыс – Жолдауда айқындалған межелі міндеттердің табысты орындалуына барынша ықпал ету. Жолдау соңында Мемлекет басшысының «Әр адамға және баршаға бірдей мүмкіндік беретін мемлекетті, яғни Әділетті Қазақстанды болашақ ұрпаққа аманат ету – баршамызға ортақ міндет» екенін жария етуі құжатта нақтыланған әрбір міндеттің барша отандасымызға ортақ екенін айқын білдіреді.
Сәкен АРУБАЕВ,
Сенат депутаты
