«ENAEE» – Еуропаның, Оңтүстік және Солтүстік Америка мен Орталық және Оңтүстік-Шығыс Азияның жиырмадан астам агенттігін қамтитын жетекші еуропалық инженерлік білім беру аккредиттеу желісі. «ENAEE Authorized Agency Award 2024» байқауында инженерлік білім сапасын қамтамасыз етуге және инженерлерді даярлауға үлес қосқан команда жеңімпаз деп танылды.
Орталық Азия білім жүйесін аккредиттеу қауымдастығының президенті, профессор Әбдімүтәліп Әбжаппаровтың айтуынша, ешқандай баламасы жоқ «ENAEE» байқауы биыл алғаш рет өтіп отыр.
Орталық Азияның білім жүйесін аккредиттеу қауымдастығы Еуропалық одақтың «Орталық Азиядағы инженерлік білім сапасы» жобасы аясында құрылған еді. Бұл жобаға елімізден бөлек, Өзбекстан, Қырғызстан, Тәжікстан, сондай-ақ Италия, Бельгия, Германия, Португалия және Ұлыбританиядан келген серіктестер қатысты. Басынан бастап біздің мақсатымыз Орталық Азия жоғары оқу орындарының еуропалық серіктестермен тығыз қарым-қатынасы мен аккредиттеу стандарттарын «ENAEE» халықаралық талаптарымен сәйкестендіру болды. Біз білімімізді ең жоғары халықаралық стандарттарға сай ұстауға тырысамыз. Қазір «ENAEE» құрамына АҚШ-тың да аккредиттеу агенттігі «ABET» кіреді. Бұл – біздің талаптарымыз бен шарттарымыздың тек еуропалық емес, Халықаралық Инженерлік Альянстың стандарттарына сәйкес келетінін көрсетеді», деді Ә.Әбжаппаров.
Бұл жоғары марапат Орталық Азия білім жүйесін аккредиттеу қауымдастығының еуропалық жоғары білім кеңістігіндегі жетекші орны мен беделін көрсетеді. Былтыр желтоқсанда «KAZSEE» Қазақстандағы заманауи білім қауымдастығы Алматы келісімі шеңберінде білім беруді аккредиттеу жөніндегі Орталық Азия қауымдастығы болып қайта құрылған еді. Оның қызметі Орталық Азияны Еуропалық одақпен ықпалдастыруға бағытталған.
Орталық Азия білім жүйесін аккредиттеу қауымдастығы жоғары оқу орындарының түлектеріне халықаралық еңбек нарығындағы сұранысты қамтамасыз ете отырып, Қазақстан мен Орталық Азиядағы білімнің ең жоғары халықаралық стандарттарға сәйкес келуіне ұмтылады.
