Қостанайда шулы істің нүктесі қойылды

ҚОСТАНАЙ. 26 қаңтар. Қостанай облыстық қылмыстық істер жөніндегі мамандандырылған сотта мемлекеттік архитектуралық-құрылыс бақылау департаментінің бұрынғы директоры Александр Ен мен оның орынбасары Елдос Ағытаевқа, лицензиялау және аттестация бөлімінің бастығы Қайрат Қасенов пен осы бөлімнің маманы Наталья Чемпаловаға қатысты қылмыстық іс бойынша үкім шығарылды. Бұл туралы ng.kz хабарлады. Олардың барлығына Қылмыстық кодекстің 307, 301, 311-бабтарына сәйкес қызметтін асыра пайдаланды, кәсіпкерлікке тосқауыл қойды, пара алды, ал департамент директоры Александр Енге бұған қосымша Қылмысты кодекстің 235-бабы бойынша қылмыстық ұйымдасқан топ құрып, оған жетекшілік етті деген айып тағылған болатын. Александр Ен кінәлі деп табылып, ол 9 жыл бас бостандығынан айырылды және жазасын қатаң режімдегі колонияда өтейтін болады. Қайрат Қасенов 7 жыл жазасын жалпы колонияда өтейді. Сот үкіміне дейін үй қамақта болған Ағытаев пен Чемпалованың да қолына сот залында кісен салынды. Олар бір жыл бас бостандығынан айыру жазасын алып, жалпы режімдегі колонияға жіберілетін болды. Үкім 106 парақтан тұрды. Онда сотталғандар мен куәлардың айтуынша, Александр Ен департаментке келген соң, кәсіпкерлерге түрлі категориядағы рецензия бергені үшін ақша алудың қылмыстық схемасы жасалған. Мұны осы істі тергеу және сот ісі үдерісіне қатысқан облыстық прокуратура қызметкері Талғат Несіпбаев та дәлелдегенін айтты. Құпия схема арқылы департамент қызметкерлері кәсіпкерлерден пара алып отырған. Нәзира Жәрімбетова. Дерек, сурет: ng.kz