![Негізгі жолдарды жаңғырту аяқталды](/media/2024/09/11/2022_05_17_jol2.jpg)
Елдің орталығы мен оңтүстігін жалғайтын, ұзындығы 885 шақырымды құрайтын «Қарағанды – Алматы» тасжолы 85%-ға дайын. Бүгінде оның 863 шақырымында жаңа асфальт-бетон жабынымен қозғалыс қамтамасыз етілген. Аталған көлік дәлізіндегі жұмыстарға 1 312 бірлік техника, 2 448 қызметкер жұмылған. Күре жолда 46 жол өтпесі, 30 көпір, 7 көлік айырығы және 661 су өткізу құбыры салынды.
Нәтижесінде, 363 шақырым болатын «Қарағанды – Балқаш» тасжолын айналып өту қажеттілігі жойылды. Сондай-ақ Қарағанды қаласынан Ақбастау және Ақсу ауылдарына дейінгі жолдың төрт жолағы бойынша қозғалыс ашылды. Аталған учаскеде асфальт-бетон төсеу жұмысының 90%-ы аяқталды. Жуық арада барлық жаңартылған телімдер бойынша көлік қозғалыс басталады. Биыл «Балқаш – Бұрылбайтал» жолында ауқымды жұмыс жүргізіліп, телімнің 80%-ына жаңа асфальт бетон төселді. Қазір 288 шақырымның 266 шақырымы қозғалыспен қамтамасыз етілген. Сондай-ақ Күрті мен Бұрылбайталды жалғаған ұзындығы 228 шақырым жол дәлізі толық жаңарды. Асфальт-бетон жабынын төсеу жұмыстары 85%-ға аяқталып, жаңа асфальт қабатымен қозғалысқа рұқсат берген. Осы кезде жауапты мердігер ұйым тосқауыл қоршауын, жол таңбаларымен белгілерін орнатуға кірісті.
«Шамалған стансасын айналып өту» автожолында 3 бірлік жол өтпесі, 1 мал өткелі, 1 көпір, 3 су өткізу құбыры орнатылды. Республикалық маңызы зор жоба жұмыстары толық аяқталды. Таяуда толық ел игілігіне берілмек.
Халықаралық тұрғыда маңызды саналатын «Ақтөбе – Қандыағаш – Атырау – РФ шекарасы (Астраханьға қарай)» тасжолының 732 шақырымы қайта жаңарту жұмысымен қамтылды. Аталған автомагистральде 47 жол өтпесі, 6 көлік айырығы, 526 су өткізу құбыры салынды. Жобаға 1 312 бірлік техника мен 2 448 жұмысшы жұмылдырылды. Қазір автожолдың тұтас бойында асфальт-бетон төсемінің жоғарғы және төменгі қабаты бойынша қозғалыс ашық.
«Ақтөбе – Қандыағаш» учаскесінде 18 көпір бойынша көлік қозғалысы іске түсіп, 8 эстакада салынды. Асфальт-бетон төсеу жұмыстары 97%-ға атқарылды. Жабынның жоғарғы қабатын төсеу және жолды абаттандыру шарасы жалғасып жатыр.
Бүгінде «Атырау – Астрахан» бағыты бойынша реконструкция жұмыстары биыл жыл соңына дейін толық мәресіне жетеді деген жоспар бар. Қайта жаңартылатын телімнің ұзақтығы – 212 шақырым. Асфальт-бетон жабынын төсеу бойынша жұмыс 82%-ды құрайды. Қазір жолдағы жұмыс белсенді түрде жалғасып жатыр. Учаскедегі қозғалыс қарқыны тәулігіне шамамен 5 000 автокөлікке жеткен. Айта кетейік, аталған тасжол толық пайдалануға берілгеннен кейін сапар уақыты 2,5 сағатқа дейін қысқарады деп күтіліп отыр.