Олар жоғары қан қысымын диагностикалауға жүздеген вокалды биомаркерді қолданған. Технологияның тиімділігін байқау мақсатында зерттеушілер 245 емделушіге тәжірибе жасаған. Мамандар екі апта бойы қатысушылардың дауысын 6 мәрте жазып, бақылауда ұстаған. Нәтижесінде, нейрожелі әйелдердің 84%-ы мен ерлердің 77%-ында жоғары қан қысымын дәл анықтауға қабілетті болып шықты. Жоба авторларының айтуынша, инновация гипертониядан бөлек, қант диабеті ауруларын да диагностикалай алады.
Жаһандық жәрмеңке
Қытайдың Фуцзянь провинциясында 24-халықаралық инвестиция және сауда көрмесі өтіп жатыр. 120 мың шаршы метрді алып жатқан технологиялық алаңды тамашалауға әлемнің 119 елінен іскер азаматтар мен саяхатшылар келген.
Сямыньдағы бұл жәрмеңке жасанды интеллект, гуманоидты робот, бұлттық есептеу және интернеттік құрылғылар саласындағы соңғы технологиялық жетістіктерге арналған. Онда 80-нен астам инновация қойылған. Әсіресе адам тәрізді құлтемірлер келушілерді түрлі қимылымен таңғалдырды. Мәселен, секундына 3,3 метр жылдамдықпен қозғалатын робот денсаулыққа қауіпті орындарда адамның орнына қызмет етеді. Ал жасанды интеллектіге негізделген роботтар шынайы сөйлей алады. Тіпті егде кісілердің жанына серік болып, сырласатын қабілетке ие.
Құрақ көрпе рекорды
Астанада өтіп жатқан дүниежүзілік көшпелілер ойындары қарсаңында еліміздің қолөнершілері 450 құрақ көрпе тігіп, Гиннесс рекордын жаңартты.
Ұйымдастырушылардың бірі Нұргүл Абайханның айтуынша, 19 облыстан 450 құрақшы келген. Олардың арасында 8 жастан 85 жасқа дейінгі шеберлер бар. «Былтыр 200 құрақшы Гиннесс кітабына ендік. Биыл өз рекордымызды жаңартып жатырмыз. Дайындықты 2024 жылдың қаңтарында бастадық. V Дүниежүзілік көшпелілер ойындары өтетінін естіп, өз үлесімізді қосқымыз келді. Басты мақсатымыз – қазақтың ауызбірлігін көрсету. 450 көрпешенің бәрі бірдей, егіз көрпедей. Бір техника, бір өлшеммен тігілген. Жайылған кезде үлкен кілем тәрізді болады», дейді ол.
