Бақытжан Орынбеков қала әкімі қызметіне тағайындалғаннан кейін БАҚ өкілдерімен өткен кездесуде «Бурыл» тұрғын алабындағы тұрғындардың тілегіне назар аударатынын, бірінші кезекте жол салу мәселесін қолға алатынын айтып, уәде берген еді. Қала басшысы сертінен тайған жоқ.
«Облыс орталығындағы тозығы жеткен көшелердің жолын қалпына келтіруге барынша назар аударып отырмыз. Өйткені тұрғындар бірінші кезекте жол мәселесін алға тартатыны бесенеден белгілі. Кейінгі жылдары жалпы ұзындығы 87,5 шақырымды құрайтын 145 көшеге асфальт жабындысы төселді. Жалпы алғанда, Тараз қаласында 1445 көше бар екенін айта кеткен жөн. Оның ішінде асфальты бар көшенің саны 902-ні құрап отырса, шағал тасжолдар саны – 543. Өткен жылы жол мәселесін шешу үшін қазынадан 3,6 млрд теңге қарастырылды. Бөлінген қаржы есебінен жоғарыда айтқан 145 көшеден бөлек, Саңырық батыр, Шостакович көшелері қайта жаңғыртудан өткізілді. Жалпы, қала көшелерінің жолын жөндеу жұмыстары ілкі сәтке де саябырсымақ емес», дейді Тараз қаласының әкімі Бақытжан Орынбеков.
Расында, соңғы уақытта қаладағы біраз көшенің жолы жөнделді. Жергілікті атқарушы билік бірінші кезекте халық тығыз орналасқан көшелердің жолын қалпына келтіруге баса назар аударып отырғанын айта кеткен жөн. Қолға алынған ауқымды жұмыстардың нәтижесінде қанағаттанарлық жағдайдағы жолдың үлесі 61 пайыздан 65 пайызға дейін артып отыр.
«Осы жылы жалпы ұзындығы 68,6 шақырымды құрайтын 118 көшені және 18 шақырымдық 7 жаяу жүргінші жолын орташа жөндеуден өткізіп жатырмыз. Одан бөлек, «Коммунальник», «Лето», «Ветеран», «Химик», «Юбилейный», «Победа» алаптарындағы жалпы ұзындығы 73,8 шақырымды құрайтын 165 көшедегі шағал жол орташа жөндеуден өткізілмек. Қолға алған осы жұмысты дер кезінде орындаған соң қанағаттанарлық жағдайдағы жолдардың үлесі 65 пайыздан 70 пайызға дейін артады», дейді қала басшысы.
«Бурыл» және «Барысхан» тұрғын алаптарына қоныстанған халықтың саны жыл өткен сайын артып келеді. Сондықтан да мұндағы көшелердің жолын қалпына келтірудің маңызы зор. «Бурыл» тұрғын алабында былтыр басталған ауқымды жұмыс осы жылы да сәтімен жалғасып жатқанын айта кеткен ләзім.
«Расында, «Бурыл А, Б, В» және «Барысхан» тұрғын алабының халқы үшін сапалы жол ұзақ жылдар бойы өзекті мәселе болып келді. Ілгеріде жергілікті жұрт бірінші кезекте жол мәселесін алға тартатын. Кейінгі жылдары халықтың көкейкесті проблемасын шешуге басымдық беріп, жұмысты жүйеледік. Қазіргі кезде «Бурыл» және «Барысхан» тұрғын алабындағы көшелерде жұмыс жүйелі түрде жүргізіліп жатыр. Өткен жылы «Бурылдағы» 75 көшенің 13-ін асфальттасақ, биыл қалған көшелерге толықтай асфальт жабындысының бірінші қабаты төселді. Ал «Барысхандағы» 8 көшеге осы жылы асфальт жабындысын төсеу жоспарланған. Сондай-ақ биыл қала көшелері мен шағын аудандардың ішкі жолдарын жөндеу жұмыстарына жергілікті бюджеттен 900 млн теңге қарастырылды. Конкурс нәтижесі бойынша жеңімпаз мердігерлермен келісімшарт жасалып, қазіргі таңда тиісті жұмыстар жүргізіліп жатыр», деді Б.Орынбеков.
Қала жұртын алаңдатқан басты мәселенің тағы бірі – кәріз суы кешені. Қазіргі кезге дейін кәріз суы қала маңындағы, Жамбыл ауданы аумағындағы сүзгі алаңдарына құйылып жатыр. Мұндағы алаңдар айтарлықтай деңгейде толды. Салдарынан жерасты суының ластану қаупі төніп тұрғаны сөзсіз. Жергілікті атқарушы билік тұрғындар тілегін назардан тыс қалдырған жоқ. Кешен салу мәселесін шешуге қолдан келгенше тырысып жатыр. Әрине, бұл кешенді салу жұмысы бір жылда аяқтала салмайтыны анық.
«Тараз қаласында кәріз сулары кешенін салу уақыт күттірмейтін үлкен мәселе екеніне ешкімнің таласы жоқ. Көкейкесті проблеманы бәріміз бес саусағымыздай жақсы білеміз. Дәл қазір кәріз сулары көршілес Жамбыл ауданында орналасқан 217 гектар аумақтағы сүзгі алаңдарына құйылып жатқанынан хабардарсыздар. Сүзгі алаңдары шамадан тыс артық толғандықтан, Аса өзені мен жерасты суларының ластану қаупі бар екенін жоққа шығармаймыз.
Жұрт көкейіндегі өзекті мәселе біздің де назарымыздан тыс қалған емес. Тараз қаласының кәріз суларын тазарту кешенінің құрылысын салу бойынша «Жол картасы» әзірленгенін айта кеткен ләзім. «Жол картасына» сәйкес, «Еуропалық Қайта Құру» және «Даму» банкінен тиісті грант бөлініп, техникалық-экономикалық негіздеме уақтылы дайындалды. Қазіргі кезде аталған техникалық-экономикалық негіздеме мемлекеттік сараптамадан өткізіліп жатыр.
Жоғарыда айтқан жұмыс аяқталғаннан кейін салалық және экономикалық сараптама жүргізіліп, мердігерді анықтау бойынша халықаралық конкурс өткізіледі. Құрылыс жұмыстары 2025-2027 жылдарға жоспарланды», деді Б. Орынбеков.
Облыс орталығы Тараз қаласында жергілікті халықты жұмыспен қамту іс-шаралары да жоспарға сәйкес жүргізіліп жатқанын айта кеткен жөн. Жергілікті атқарушы билік келтірген дерекке жүгінсек, осы жылы 21 035 тұрғынды жұмысқа орналастыру жоспарланса, қазіргі кезге дейін 12 250 жұмыс орны ашылыпты. Өткен жылдың есепті мерзімімен салыстырсақ, жұмыссыздық деңгейі 4,9 пайызды құрап отыр. Бұл былтырғы көрсеткіштен 0,8 пайызға төмен.
Тараз
