«Бурабай» паркіндегі құбылмалы пецица (Peziza varia), күзгі желі (Gyromitra infula), ақ саңырауқұлақ (Hygrocybe conica), рамария (Ramaria eumorpha), ойық саңырауқұлақ (craterellus cornucopioides), қозықұйрық (lepiota magnispora), ағашқұлақ (phaeolus Schweinitzii) сынды саңырауқұлақ түрлері әлемнің бірнеше елінде Қызыл кітапқа енген. Ғалымдардың тағы бір олжасы – торлы саңырауқұлақ (Clavariadelphus sp.). Бұл сирек кездесетін өсімдіктің үстіңгі қабаты жіңішке таяқша тәріздес болса, түсі әдетте ашық-сары немесе сарғылт, кейде тіпті, қызыл болады екен. Басты ерекшелігі – 3-5 жылда бір-ақ мәрте өсіп шығатынында. Ұлттық табиғи парктің ақпарат және экологиялық мониторинг бөлімінің аға ғылыми қызметкері, ауыл шаруашылығы ғылымдарының кандидаты Евгений Архипов саңырауқұлақтарды зерттеп, зерделеуге көбірек көңіл бөлетінін айтты.
«Торлы саңырауқұлақтың табылғаны бізге үлкен олжа болды. Енді Қазақстанның Қызыл кітабына енгізілуі мүмкін. Бұл жаңалық Ұлттық саябақтың өсімдік әлемінің алуандығын көрсетеді. Соның ішінде саңырауқұлақтар тобын одан әрі зерттеп, қорғау қажет екеніне тағы көз жеткізіп отырмыз. «Бурабай» МҰТП ақпарат және экологиялық мониторинг бөлімінің ғылыми қызметкерлері алғаш рет ұлттық парк аумағында өсетін саңырауқұлақтардың барлық түрлерін қамтитын микологиялық тізім жасайды. Бұл – экожүйені терең зерттеуде және аймақтың биологиялық алуандығын қорғауды қамтамасыз етуде маңызды қадам болады. Микология (саңырауқұлақтар туралы ғылым) экожүйедегі үдерістерді түсінуде ерекше маңызға ие, себебі саңырауқұлақтар органикалық заттардың ыдырауы мен топырақтың құнарын сақтауда үлкен рөл атқарады», деді Е.Архипов.
«Бурабай» мемлекеттік ұлттық табиғи парк қызметкерлері ұлттық парктің микологиялық тізімін жасауды қолға алған. Тізімге саябақ аумағында өсетін саңырауқұлақтардың барлық түрі қосылуға тиіс. Мамандардың айтуынша, саябақ аумағында жүргізілген зерттеулер экожүйе туралы жиналған деректерді молайтып қана қоймай, табиғатты қорғаудың тиімді іс-шараларын қолға алуға ықпал етеді. Мысалы, «Бурабай» МҰТП ботанигі Юлия Боссерт саңырауқұлақтар қоректік заттар айналымына және ағаштардың саулығына ерекше әсер ететінін айтады. Демек, оны зерттеуге ден қою Ұлттық парктің табиғатын қорғау үшін де маңызды.
