Солтүстік Қазақстанда төтенше жағдайлар жиілеп тұр

ПЕТРОПАВЛ. 27 қаңтар. Петропавл қалалық мәдениет үйінде Төтенше жағдайлар жөніндегі комитет төрағасының орынбасары, өртке қарсы қызмет генерал-майоры Серік Әубәкіровтің төрағалығымен Солтүстік Қазақстан облыстық департаментінің өткен жылы атқарған жұмыстарының қорытындысына және алда тұрған міндеттерді, сонымен бірге сыбайлас жемқорлықтың алдын алу мәселелерін талқылауға арналған кеңес болып өтті. Аталмыш шараға облыс әкімінің орынбасары Владимир Бубенко қатысты. Бұл туралы облыстық төтенше жағдайлар департаментінің баспасөз қызметі хабарлады. Облыстық төтенше жағдайлар жөніндегі департамент бастығының міндетін атқарушы, өртке қарсы қызмет полковнигі Әсет Ысмағұловтың есебіне қарағанда, былтыр 235 шара өткізілген. Қарлы бұрқасын құрсауынан 497 адам мен 98 техника босатылып, қауіпсіз жерге көшірілген. Облыс аумағында төтенше жағдайларды жою үшін құрамында 1 032 адам мен 440 техника бар 14 шұғыл қимыл жасағы құрылып, жұмыс істеуде. Өрт қауіпсіздігін қамтамасыз ету үшін бірқатар ауылдарда өрт сөндіру қосындары құрылған. Қазіргі уақытта ауылдық елді мекендерде 157 өрт сөндіру автомобилі және 1 017 бейімделген техникасы бар 497 ерікті өрт сөндіру құрылымы жұмыс істейді. 123 зардап шеккен адамға алғашқы медициналық көмек көрсетілген. Департамент қызметкерлері төтенше жағдайлардың алдын алу мақсатында облыстың 505 нысанына тексеру жүргізіп, өрт қауіпсіздігін сақтауға салғырт қараған 546 адамды әкімшілік жауапкершілікке тартты. Атқарылған шаралдарға қарамастан өткен жылы облыста 155 төтенше жағдай орын алған. 812 өрт оқиғасы тіркеліп, 119 миллион теңге материалдық шығын келген. 47 адам қаза тапқан. Өмір Есқали. Дерек: Солтүстік Қазақстан облыстық төтенше жағдайлар жөніндегі департаменттің баспасөз қызметі. Сурет: news.nur.kz.