Петропавлда газдан уланған екі адам ауруханаға жатқызылды

ПЕТРОПАВЛ. 27 қаңтар. Петропавл қаласының Н.Островский көшесіндегі жылу коллекторында белгілі бір тұрағы жоқ 24 және 45 жастағы екі адам дене жарақатын алып және газдан уланып, ауруханаға түсті. Олар мас күйде болып, өрт қауіпсіздігін сақтамаған. Бұл туралы облыстық төтенше жағдайлар жөніндегі департаменттің баспасөз қызметі хабарлады. Облыс орталығының Украин көшесінде өз үйінің ауласында 43 жастағы петропавлдық автомобиліне жанармай құйып жатып, үстіне бензин төгіп алған. Сырт киімін шешіп жатқанда электр ұшқынынан бензин буы өздігінен тұтанып, автокөлік иесі термиялық күйікке шалынған. Ол ауыр жағдайда ауруханаға жеткізілді. Булаево қаласындағы және Возвышенка ауылындағы тұрғын үйлерден, Петропавл қаласының Ружейников көшесіндегі гараждан шыққан өртке пештердің ақауы себеп болған. Булаево мен Петропавл қалаларында сымдардың қысқа тұйықталуынан және көлікті газбен қыздырудан екі шетелдік автомобиль өртенген. Жыл басынан бері облыста 50 өрт оқиғасы тіркелді, 2 адам қайғылы қазаға ұшырады, 3 адам әртүрлі деңгейде дене жарақатын алды. Өмір Есқали. Дерек: Солтүстік Қазақстан облыстық төтенше жағдайлар жөніндегі департаменттің баспасөз қызметі. Сурет: otyrar.kz.