Фото: ru.freepik.com
Қызықты деректі «Egemen Qazaqstan» газетінің тілшісі Бекзат Құлшар «Ғалам ғажаптары: Орман қорғаушы жасанды интеллект» танымдық мақаласында тілге тиек етті.
Бразилиялық мамандардың айтуынша, бұл істе ұшу апараттарының пайдасы зор. Әсіресе адам қолы жете бермейтін жерлерде әлеуеті кең.
Мәселен, арнайы дрондар небәрі бір күнде 50 гектар аумаққа тұқым сеуіп шығады. Бұл адамның еңбек күшінен әлдеқайда жылдам әрі өнімді екенін дәлелдейді. Бразилия билігі аталған технологияның арқасында бір миллион түп ағаш егуді көздеп отыр.
Мұндай заманауи әдістер Қазақстанда қолданылады ма? Бұл сұраққа да жауап іздеп көрдік.
Елімізде дрондар егін шаруашылығында пайдаланылады. Десе де, бұл енді ғана қалыптасып жатқан үрдіс. Одан бөлек, Қазақстанда дрон шығару саласында да алғашқы қадамдар жасалып жатыр. Мәселен, «Атамекен» кәсіпкерлер палатасы ауыл шаруашылығы, мұнай-газ, тау-кен және өнеркәсіптің басқа да салалары үшін Қытаймен бірлесіп дрон шығаратын кәсіпорын құру жоспарланып отырғанын мәлімдеген еді.
Ал Kansas State University жүргізген зерттеулерге зер салсақ, дрондарды қолдану арқылы дақылдардың «денсаулығын» бақылау, арамшөптерді анықтау және өнімділікті арттыруда шығындарды 75 пайызға дейін азайтуға болады.
