Абай даңғылы бойындағы құтты шаңырақта ардақты ақын 2000-жылдардың басынан бастап, ақырғы демі үзілгенге дейін тұрып, көптеген шығармасын жазды. Әсіресе «Бостандық жырының бозжорғасы» атанған шайырдың елордаға көшіп келгеннен кейін жаңа тынысы ашылып, ел тәуелсіздігі мен сол жолда құрбан болған баһадүрлер туралы тебіреніп жырлады. Соңғы деміне дейін қолынан қаламын тастамаған қаламгердің ұлттық құнарға бай айшықты өлеңдерінен басқа, 40-қа жуық кең тынысты поэма өмірге келді. Солардың дені осы үйде жазылды.
Іс-шараны жүргізген Қазақстан Жазушылар одағы Астана қалалық филиалының директоры Дәулеткерей Кәпұлы алдымен қазақ өлеңінің аспанында үйір-үйір бұлт айдаған айтулы ақын шығармашылығына тоқталды. Одан кейін сөз алған Астана қаласы мәслихатының төрағасы Ерлан Қаналимов ұлт әдебиетінің қазынасын байытқан сыршыл суреткердің руханиятымызға қосқан үлесі мол екенін жеткізді.
«Несіпбек Айтұлы секілді тұрпаты бөлек таланттар сирек кездеседі. Ағамыздың жазған дүниелері – ұлтымыздың ғана емес, әлем әдебиетінің інжу-маржаны дер едім. Поэзияда жыраулардың жолын жалғап, өнегелі із қалдырды. Сондықтан ақынның шұрайлы тілмен шынайы жазылған шығармалары – жас ұрпаққа мәңгілік қазына болып қала береді», деді ол.
Ал белгілі ақын, Мемлекеттік сыйлықтың лауреаты Ғалым Жайлыбай бүгінгі оқиға елорданың рухани-мәдени әлеміндегі мазмұнды іс-шара екенін айтты.
«Қазақ руханиятына талмай еңбек еткен Несағаң туралы көп айтуға болады. Шын мәнінде, ол – бақытты адам. Екі қоғамдық формацияны көріп, екі ғасырда ғұмыр кешті. Ұрпақ өсірді. Қазақ өлеңінің ғажайып үлгілерін жаңартты. Бір сөзбен айтқанда, Несіпбек Айтұлы – ұлт руханиятындағы жұлдызы жарық тұлғаның бірі. Оның ағыл-тегіл ақ жаңбырдай төгілген өлеңдері, «Ән домбыра», «Сарыарқа», «Дәурен-ай», «Арман», «Дариға, дәурен» деген ел сүйіп тыңдайтын әнге жазған сөздері, Жүніс Еміреден бастап, Әлішер Науаиға дейінгі аудармалары – ұлт әдебиетінде ақын есімін айшықтап тұрады», деген Ғ.Жайлыбай қаламдас ағасының рухына арнап жазған өлеңін оқыды.
Бұдан кейін «Amanat» партиясы Ақсуат аудандық филиалының төрағасы Ержан Құттыбаев ақын жерлестерінің сәлемін жеткізсе, баласы Нұрат Несіпбекұлы осы тақтаны қоюға мұрындық болған Астана қаласы әкімдігі мен жиналған қауымға ризашылығын білдірді. Ескерткіш тақтаны ақынның зайыбы Манат апай мен Астана қаласы мәслихатының төрағасы Ерлан Қаналимов ашты.
