Қазір өңірде 650 учаскелік комиссия жұмыс істеп жатыр, олардың құрамында 4 440 адам бар. Қарағанды облысында барлығы 761 604 сайлаушы тіркелген, оның 4 605-і – мүгедектігі бар адамдар. Жергілікті билік сайлау күні оларға барлық жағдай жасалатынын айтты. Сондай-ақ тұрғындарды әлеуметтік желілер, мессенджерлер арқылы ақпараттандырып жатыр, арнайы онлайн-сервистер іске қосылған. 15 call-орталық ашылып, 109 қызметі жұмыс істейді.
ОРК төрағасы облыс орталығындағы №792 және №794 учаскелерінде болып, дайындық жұмыстарымен танысты. Одан соң Н.Әбдіров аумақтық референдум комиссиялары төрағалары, құқық қорғау, өзге де мемлекеттік органдар басшыларымен кеңес өткізді. Онда алдағы науқанның негізгі ерекшеліктері, референдум өткізуге дайындық, сондай-ақ электоралдық үдерісінің барлық кезеңінде ашықтықты қамтамасыз ету, заңдылықты сақтау мәселелері талқыланды.
Қарағанды облысы әкімінің орынбасары Әлібек Әлденей өңірде референдумға қатысуға құқығы бар азаматтардың тізімі нақтыланып жатқанын жеткізді. Облыс прокурорының орынбасары Талғат Мұқашев электоралдық кезеңінде заңдылықты сақтау туралы баяндама жасаса, облыстық Полиция департаментінің бастығы Негмет Исмағұлов науқан кезеңінде, дауыс беру күні құқықтық тәртіпті сақтау жөнінде есеп берді.
Сондай-ақ атқарылған жұмыстар легін Жұмыспен қамтуды үйлестіру және әлеуметтік бағдарламалар басқармасының басшысы Әсем Жүніспекова мен Қарағанды облысының АРК төрағасы Қайрат Нүркенов тізбектеп шықты.
Қарағандыдан оралған соң, ОРК төрағасы елорданың ОРК төрағасымен, Астана және қала аудандарының АРК мүшелерімен, мемлекеттік және құқық қорғау органдарының өкілдерімен кеңес өткізіп, алдағы плебисцитке дайындық бойынша жүргізіліп жатқан жұмыстардың есептерін тыңдады.
Н.Әбдіров кеңес қатысушыларына республикалық референдум өткізуге дайындықтың заңнамалық жаңашылдықтары мен ерекшеліктерін түсіндірді. Ол референдум мен сайлау заңнамасының нормаларын қатаң сақтап, комиссиялардың барлық мүшесін үздіксіз әрі сапалы оқыту қажет екенін айтты.
Қала әкімінің орынбасары Есет Бәйкен референдумға қатысуға құқығы бар азаматтардың тізімдері, референдумды ұйымдастыру, ақпараттық, материалдық-техникалық қамтамасыз етуде жүргізіліп жатқан жұмыстар туралы баяндады. Астана қаласының Жұмыспен қамту және әлеуметтік қорғау басқармасының басшысы Илья Скуб мүгедектігі бар адамдардың сайлау құқықтарын іске асыру туралы хабардар етті.
Сондай-ақ қалалық прокуратура мен полиция департаменті басшыларының орынбасарлары есеп берді. Астана қаласының аумақтық референдум комиссиясының төрағасы Бейсембай Жұмабеков референдум комиссияларының қызметі және дауыс беру күніне дайындық өз кезегімен жүріп жатқанын жеткізді.
Екі өңірде де ОРК басшысы дауыс беру күні жергілікті атқарушы органдардың электр қуатымен әрі интернетпен үздіксіз қамтамасыз етуге, ал ішкі істер органдарының учаскелерде және іргелес аумақтарда қоғамдық тәртіпті сақтау маңызды екенін айтты. Сонымен қатар Н.Әбдіров аумақтық референдум комиссияларына тұрғындарды толық ақпараттандыруды тапсырды және дауыс беретін учаскелік комиссия мүшелері үйлерді аралап, жеке шақыру қағаздарын үлестіру қажет екенін атап өтті. Бұл – маңызды істің бірі.
Бұған қоса барған өңірлерде Н.Әбдіров аумақтық референдум комиссияларының мүшелерімен жеке кеңестер өткізді. Оған дейін ОРК төрағасы елорданың әр ауданындағы учаскелерге барып, дауыс беруге дайындық барысымен танысқан еді. Учаскелерді жарақтандыру және дауыс берушілерге қолайлы жағдай жасап, мүгедектігі бар адамдардың сайлау құқы тапталмауын шегелеп тапсырды.
