Сурет: facebook.com@Taraz.24
Медиасауаттылық – қазіргі кезеңнің басты талабы. Өйткені сөйлем құрылысы мен әріп қателерден бөлек, кей журналистер деректі тексеруді, оның рас-өтірігіне көз жеткізбей жариялауға болмайтынын, оған қоса медиа этиканың бар екенін түсіне бермейді. Осыған орай панельдік сессияларда фактчекинг, медиаэтика, медиасауаттылық тақырыптары көтерілді. Тіпті журналистер арасында диктант өтті.
Сондай-ақ медиа апталықта жұртшылықты өңірлік БАҚ-тың контентімен таныстыруға мүмкіндік туды. Аймақтардағы медианың проблемаларына да баса назар аударылды. Әсіресе қатысушылар маман тапшылығын баса айтты. Меніңше, жоғары оқу орындарындағы журналистикаға түсу тәртібін өзгерту қажет. Оған қоса университеттерге теориялық білімі мен практикалық білігі ұштасқан кәсіби мамандарды көбірек тарту керек.
Тағы бірі қаузалған өзекті мәселенің бірі – балалар контентін дамыту. Аталған тақырып турасында шетелдік мамандар да шақыртылып, трендтегі форматтар талқыланды. Негізі бұл проблема бұған дейін Атырауда өткен Ұлттық құрылтайда да көтерілген еді. Мақсат – медиа платформалардағы қазақ тілінің қолданыс аясын арттыру.
Зарина ҚУАТОВА,
«Тараз 24» телеарнасының директоры
