Сөйтсек, осылай ұшу арқылы құстар энергия үнемдейді екен. Алдыңғы қатардағы құс қанаттарын қағып, артындағыларға ауа ағынын тудырады. Сонда артқы қатардағылар аз күш жұмсап, оңайырақ ұшады. Көш басындағы құс шаршағанда, кейінгілерімен ауысады. Осы тәсіл авиацияда «аэродинамикалық сүйреу» деп те аталады.
Құтқарушы қаз
Жақында көшеден жаралы көгершін көрдім. Нан табу мен мән табудың арасында сабылып жүріп, ештеңе істеместен, өтіп кеттім. Ал кейін мына бір оқиғаны оқып, қатты өкіндім...
2021 жылы Лондонда ерекше оқиға болған екен. Жаралы қаз өзіне көмек керегін білдіру үшін адамдарға жақындаған. Сол жерде жүрген дәрігер Джоанна Тригано ветеринарға апармақ болады. Қаз таңғаларлық түрде дәрігердің артынан еріп, клиникаға барған, емделген. Кейіннен дәрігер Джоанна жұмыс істейтін ауруханаға ауыр жарақат алған адам түседі. Ең ғажабы, ол адам «Мен көшеде қансырап жаттым, көмекке адамдарды бір қаз шақырды. Қаз адамдарды маған қарай қуды» деген. Джоанна кішкентай құтқарушының өзі емдеген қаз екеніне еш күмәнданбады.
Құрметке бөленген көгершін
«Ел тілегін алып ұш, адамзаттың бағына. Қара бұлтты жарып ұш, мұхиттың арғы жағына». Нығмет Баймұхамедов жазған осы жолдарды оқығанда, әндете жөнелетініңізге шүбәм жоқ. Ал осы әнді жазған Ахмет Жұбанов мына бір оқиғаны білді ме екен...
Бірінші дүниежүзілік соғыс кезінде америкалық сарбаздардың бір тобы француз жерінде қоршауда қалады. Олар байланыс орнату үшін Шер Ами атты көгершінге хат беріп, сенім артқан. Көгершінге жолда оқ тиеді. Соған қарамастан, ол хабарды жеткізіп, сарбаздарды құтқаруға көмектеседі. Осы ерлігі үшін қанатты байланысшы «Францияның әскери құрмет белгісі» марапатына ие болған.
