Жанкүйерлер 48 кг салмақтың финалын тағатсыздана күтті. Өйткені екі бірдей әлем чемпионы бас жүлдеге таласуға тиіс еді. Олар – Санжар Тәшкенбай мен Теміртас Жүсіпов. 36 жастағы Теміртасқа бұл белес 2021 жылы Белградта бағынса, 21 жастағы Санжар былтыр Ташкенттегі дүбірлі додада дараланды. Бірақ бастапқы бәсекелерде алған жарақатына байланысты Тәшкенбай шаршы алаңға шықпады. Сөйтіп, Жүсіпов жұдырықтаспай-ақ жеңімпаз атанды. Сол секілді Нұрсұлтан Алтынбек пен Сәкен Бибосынов (54 кг), Сабыржан Аққалықов пен Абылайхан Жүсіпов (71 кг) сынды саңлақтар арасындағы финалдық сайыстар өтпеді. Оған да атақты боксшылардың жарақаттануы себеп болды. Нәтижесінде, бас жүлде Нұрсұлтан мен Сабыржанға бұйырды.
51 кг салмақ дәрежесінің финалында Дамир Әбдіқадыр мен Даниал Сәбит күш сынасып, алғашқысы жеңіске жетті. Бұл бәсеке мерзімінен бұрын тоқтатылды.
57 кг салмақта Махмұд Сабырханның топ жаратынына күмәнданғандар кемде-кем еді. Алайда уақыт озған сайын қарқыны күшейіп келе жатқан Оразбек Асылқұлов әлем чемпионының алдын орады. Ол техникалық та, тактикалық тұрғыдан да әйгілі қарсыласынан басым болды. Кезінде Өзбекстанның мақтанышы, Олимпия ойындары мен дүниежүзілік додада дараланған Абдумәлік Халоковты сабаған Оразбек үшінші раундта сол қолының соққысымен Махмұдты сұлатып түсіре жаздады.
60 кг салмақ дәрежесінде Бейбарыс Жексеннің бағы жанды. Шешуші шайқаста ол әлем, Азия чемпионаттарының күміс жүлдегері Серік Теміржановты тізе бүктірді. 63,5 кг салмақта Ертуған Зейнуллинов ерледі. Былтыр Азия ойындарына қатысқан сақа спортшы финалда Жандос Қыдырәліні қапы қалдырды. 67 кг салмақта Мұхаммедсабыр Базарбайұлының мерейі үстем болды. Финалда оның жолы Илья Калининмен түйісті. Есімі көпшілікке беймәлім боксшы соның алдында ғана әлем чемпионатының финалисі Дулат Бекбауовтан басым түсіп, көпшілікті таңғалдырған еді. Бұл жолы олай болмады. Мұхаммедсабыр Ильяның еркін көсілуіне еш мүмкіндік бермеді. 75 кг салмақта Диас Молжігітов топ жарды. Финалда ол Нұрқанат Райысты ұтты. 80 кг салмақта Ерасыл Жақпеков жеңіс тойын тойлады. Қандасымыз украиналық Никита Засенокпен жұдырықтасты. Днепрдің жағалауынан келген осы жігіт жартылай финалда танымал боксшы Тұрсынбай Құлахметті қапы қалдырған еді. Бірақ Никитаның Диасқа әлі жетпеді.
86 кг салмақта Бекзад Нұрдәулетовке тең келер ешкім табылмады. Кезінде әлем чемпионы атанған Бекзат кейіннен кәсіпқойлар арасында күш сынасты. Міне, енді, әуесқойлар рингіне қайта оралып, Қарақозы Әбдәлиевтің турнирінде өзінің мықтылығын мойындатты. Бас жүлде жолындағы тартыста ол Темірлан Мұқатаевтан басым түсті. 92 кг салмақ дәрежесінде Сағындық Тоғамбайдың бағы жанды. Финалда ол тәжірибесі әбден толысқан Абзал Кұттыбековтен айласын асырды. Ал +92 кг салмақта Айбек Оралбайдың шеберлігіне тәнті болдық. Күні кеше ғана аса ауыр салмаққа ауысқан Айбек ақтық сында Нұрлан Сапарбайды сан соқтырды.
