Сурет: ru.freepik.com
Каспий теңізі жағалауында сарапқа салынған 12 бас жүлденің жетеуін жерлестеріміз жеңіп алды. 54, 57 кг салмақта Маңғыстау облысының өкілдері Самат Жетібаев пен Жолдас Жеңісовтің мерейі үстем болды. Финалда Самат Бағлан Кенжебековке (Жамбыл) сан соқтырса, Жолдас Хусровхан Рақымовты (Тәжікстан) ұтты. Аса жеңіл салмақта түркістандық Нұрғиса Тұрабековтің бағы жанды. Шешуші тұста ол Жанкүйер Пернебекті (Алматы облысы) тізе бүктірді. 86 кг салмақтың бас жүлдесін де дәл сол өңірдің өкілі олжалады. Ол – Бекболат Әбдікерім. Ақтық сында Бекболат Телман Мәмедовтен (Алматы облысы) басым түсті. 51 кг салмақ дәрежесінде актөбелік Бекзат Алдамжаров Нордржан Мырзахметовтен, 80 кг салмақтағы Дәулет Төлемісов Сардор Шомұратовтан айласын асырып, жеңіс тұғырының ең биік сатысына көтерілді. Жеңілген жігіттердің екеуі де – Өзбекстаннан. 60 кг салмақта Жамбыл облысының жампозы Ерхан Тұрлан ерледі. Финалда ол өзінің командалық әріптесі Бағлан Кенжебековті қапы қалдырды.
Бас жүлденің төртеуін Өзбекстанның өрендері олжалады. Олар – Саят Ілиясов (63,5 кг), Шахбоз Юнусәлиев (67 кг), Сиражатддин Хожахметов (75 кг), Мұзратбек Тохиров (92 кг). 71 кг салмақта Әзербайжанның мықтысы Сархан Әлиевке ешкімнің әлі жетпеді. Аса ауыр салмақта да Каспийдің арғы жағалауынан келген Махаммад Абдоллаевтың асығы алшысынан түсті.
Ақтауда жыл сайын дәстүрлі түрде ұйымдастырылып тұратын турнирге Азия бокс конфедерациясының вице-президенті Әзиз Қожамбетов, Ұлттық құраманың мемлекеттік жаттықтырушысы Аслан Егубаев, Бейжің Олимпиадасында қазылық еткен танымал төреші Берікбол Қасымханов, Маңғыстау боксының ардагерлері Нағашыбай Жариев пен Бақыт Шапқан құрметті қонақ ретінде қатысты.
