Екіжақты кездесулер өтті

Онда тараптар Съезді дамыту­дың 2033 жылға дейінгі тұжырым­дама­сын іске асыру бағытындағы басым­дықтарды белгіледі. Сондай-ақ келесі жылдың қыркүйегінде Астана­да өтетін Әлемдік және дәстүрлі діндер лидерлерінің VIII съезі­н­е дайындық жоспарын талқылады.

Қасиетті Тақтың дінаралық диалогі жөніндегі Дикастериясы Ислам мәселелері бюросының басшысы монсеньор Халед Акашемен кез­десуде сұхбаттасушылар Съезд хатшы­лығы мен Қасиетті Тақтың жемісті ынтымақтастығына назар аударды. Кездесуде Қасиетті Тақ Қазақстанның конфессияаралық және дінаралық келісімді ілгерілету жөніндегі бастамаларына үнемі қолдау көрсетіп келе жатқаны да сөз болды. Сондай-ақ тараптар алдағы он жылға арналған Съезд тұжы­рымдамасын іске асыру аясындағы маңызды міндеттер жөнінде пікір алмасты.

Сонымен қатар Мәулен Әшімбаев Қытай буддистер қауымдастығының вице-президенті Чжэн Цэмен кездесті. Іс-шарада адамзатты алаңдатқан өзекті проблемаларды шешуде жас дін лидерлерінің әлеуетін тиімді пайда­лану мәселесі әңгімеге арқау бол­ды. Хатшылық басшысы бұл орай­да Әлемдік және дәстүрлі діндер ли­дерлері съезі мен VI Дүниежү­зі­лік будда форумының көздеген мақ­сат­тары үндес екеніне назар аударды.

Мұсылман ақсақалдар кеңесі­нің Бас хатшысы Мұхаммед Әбдел­са­лам­мен кездесуде Мәулен Әшімбаев мейманды съездің Ізгі ниет елшісі болып сайлануымен құттықтады. Сондай-ақ оған Форум идеяларын қол­дағаны, оларды жүзеге асы­руға қосқан белсенді үлесі үшін алғыс білдірді. Сұхбат кезінде Мұсыл­ман ақсақалдар кеңесі мен Әлем­дік және дәстүрлі діндер лидер­лерінің съезі­нің жаһандық дінара­лық және өр­ке­ниетаралық диалогті одан әрі да­мы­ту жолындағы өзара іс-қимыл мә­се­лелері де назардан тыс қалған жоқ.

Өз кезегінде мәртебелі меймандар Қазақстанның толеранттылық пен келісім сияқты құндылықтарды дәріп­­теу бағытында атқарып отыр­ған ауқымды жұмысын жоғары баға­лап, алғысын жеткізді. Бұған қоса олар ынтымақтастықты одан әрі ны­ғайтуға және 2025 жылғы 17-18 қыр­күйекте «Діндер диалогі: бола­шақ жо­лындағы синергия» деген тақы­рып­пен өтетін Әлемдік және дәстүр­лі дін­дер көшбасшыларының VIII съезіне қатысуға дайын екенін атап өтті.